كەركوك؛ بەهۆی تەقینەوەی بۆمبێكی چێنراو شەش كەس بونە قوربانی

12:43 - 11/10/2018
کوردستان


پۆلیسی كەركوك: لێكۆڵینەوە لە روداوەكە دەستیپێكردوە

بەهۆی تەقینەوەی بۆمبێكی چێنراو لە كەركوك شەش كەس بونە قوربانی و پۆلیسی كەركوكیش رایدەگەیەنێت: تا ئێستا هیچ كەسێك بە هۆكاری ئەنجامدانی تەقینەوەكە دەستگیرنەكراوە.

لە بارەی روداوەكەوە, ئەفراسیاو كامیل وتەبێژی پۆلیسی كەركوك بە KNN ی راگەیاند: سەرلەبەیانی ئەمڕۆ لەسەر رێگەی كەركوك-بەغداد بۆمبێك كە بە ئۆتۆمبێلێكەوە لكێنراوە  تەقیوەتەوەو بەهۆیەوە دوو كەس گیانی لەدەستداوەو چوار كەسی دیكەش بریندار بوون.

وتیشی: لە دوای روداوەكە پۆلیس گەیشتوەتە شوێنی تەقینەوەكەو بریندارەكان بۆ نەخۆشخانەی كەركوك گوازراونەتەوە.

وتەبێژی پۆلیسی كەركوك ئاماژەی بەوەشكرد,  پەڕاوی لێكۆڵینەوەیان بۆ روداوەكە كردوەتەوە بەڵام تا ئێستا هیچ كەسێك بە هۆكاری ئەنجامدانی تەقینەوەكە دەستگیرنەكراوە.

1047 جار خوێندراوەتەوە