ناتانیاهۆ: ئێستا كاتیەتی كە وڵاتانی ئەوروپا دژی ئێران پشتیوانیی ترەمپ بكەن

04:17 - 13/09/2018
جیهان

ناتانیاهۆ: گەمارۆكانی ئەمریكا كاریگەرییان لەسەر تاران هەبووە 
یسرائیل كاتز: ئەگەر ئێران لە رێككەوتنەكە بكشێتەوە رووبەڕووی وەڵامی سەربازی دەبێتەوە


سەرۆك وەزیرانی ئیسرائیل لە كۆبوونەوەی هەفتانەی كابینەی حكومەتەكەیدا پشتیوانیی وڵاتەكەی بۆ گەمارۆكانی ئەمریكا دژ بە ئێران دوپاتكردەوە و وەزیری هەواڵگریی وڵاتەكەش رایگەیاند: كە ئەگەر تاران لە رێككەوتنە ئەتۆمیەكە بكشێتەوە ئەوا رووبەڕووی وەڵامی سەربازی دەبێتەوە.

بنیامین ناتانیاهۆ، لە كۆبوونەوەی هەفتانەی كابینەكەیدا داوای لە وڵاتانی ئەوروپا كرد، كە دژ بە ئێران بچنە پاڵ هەوڵەكانی دۆناڵد ترەمپی سەرۆكی ویلایەتە یەكگرتووەكانی ئەمریكا و رایگەیاند: كە گەمارۆ ئابوریەكانی ئەمریكا دژ بە تاران كاریگەریی ئەرێنی-یان هەبووە.

یسرائیل كاتز، وەزیری هەواڵگریی ئیسرائیل-یش لە كۆبوونەوەكەدا ئامادەبوو و رایگەیاند: كە ئەگەر ئێران پابەند نەبێت بە رێككەوتنە ئەتۆمیەكەوە، ئەوا وەڵامی ئەم پابەند نەبوونەی ئێران وەڵامی سەربازی دەبێت و هەڕەشەكانی سەر تاران دەبنە هەڕیشەی ڕاستەوخۆ لەلایەن ئەمریكا و هاوپەیمانەكانیەوە.

ناوبراو ئاماژەشی كرد بەوەی، كە ئێران لە ئێستادا تەنها دوو رێگەچارەی لەبەردەمدایە، یەكەمیان پەسەندكردنی پێشنیازەكانی ئەمریكایە و دووەمیش هەرەسهێنانی تەواوەتیی ئابوریی وڵاتەكە.

4275 جار خوێندراوەتەوە