ڕاكردن مرۆڤ بە گەنجی دەهێڵێتەوە

08:03 - 12/09/2018
تەندروستی

یەكێك لەو توێژینەوانەی لەسەر سوجی وەرزشكردن ئەنجامدراوە دەرخستوە، ڕاهێنانە وەرزشییەكان بە گشتی و ڕاكردن بە تایبەتی، تەنها بۆ كەمكردنەوەی ئەگەری توشبوون نییە بە نەخۆشییە جیاوازەكان،بەڵكو كاریگەری ڕاستەوخۆی لەسەر پێست دەبێت.

بەپێی ئەنجامی توێژینەوەیەكی ئەمریكی ئەنجامدانی وەرزشی ڕاكردن بەشێوەیەكی ڕێكخراو، كاریگەری راستەوخۆی هەیە لەسەر درەنگ دەركەوتنی نیشانەكانی پیری لەسەر پێست.

 

توێژینەوەكە لە زانكۆی هۆمبۆلت ستەیت لە ئەمەریكا ئەنجامیانداوە و باسی لەوە كردووە ئەنجامدانی وەرزشی ڕاكردن سودی زۆری هەیە، بەجۆرێك هەر كەسێك بۆ ماوەی 30 خولەك و لە هەفتەیەكدا سێ رۆژ رابكات، ئەوا نیشانەكانی پیری درەنگتر لەسەر پێستی دەردەكەوێت.

 

توێژینەوەكە لەسەر ژمارەیەك هاوڵاتی ئەنجامدراوە كە وەرزشی راكردنیان ئەنجامداوە و تەمەنیان سەرو 65 ساڵەوەبووە، لە ئەنجامدا دەركەوتوە ئەو كەسانە هاوتای گەنجان توانای راكردن و جوڵەیان هەیە و پارێزگارییان لە گەنجێتی خۆیان كردوە.

 

توێژەرەكان داوا دەكەن كە گرنگییەكی زیاتر بدرێت بە ڕاهێنانە وەرزشییەكان و بەشێوەیەكی ڕێكخراو ئەنجام بدرێت، بە تایبەت وەرزشی ڕاكردن، چونكە جگە لە سودەكەی بۆ پێست ئەگەری توشبوون بە چەندین نەخۆشیش كەمدەكاتەوە.

1340 جار خوێندراوەتەوە