سندوقی كۆمەكی شێرپەنجە ڕوونكردنەوەیەك بڵاودەكاتەوە

09:47 - 08/09/2018
تەندروستی

سندوقی كۆمەكی شێرپەنجە: كەمبوونەوەی دەرمان نەگەیشتووەتە ئاستی مەترسیدار
سندوقی كۆمەكی شێرپەنجە: ئەو كەمپینە كەمپینی كۆكردنەوەی دەنگە
سندوقی كۆمەكی شێرپەنجە: داوا لە هاوڵاتیان دەكەین بەو كەمپینە چەواشەكارییە باوەڕ نەكەن

 
سندوقی كۆمەك بۆ توشبوانی شێرپەنجە، ڕەتیدەكاتە دەرمان لە نەخۆشخانەی هیوا كەمبوبێتەوە‌و كەمپینی لایەن ‌و كەناڵێكیش بەهەوڵێكی چەواشەكاری ‌و بۆ كۆكردنەوەی دەنگ ناودەبات.

سندوقی كۆمەك بۆ توشبوانی شێرپەنجە، لە رونكردنەوەیەكدا رایگەیاندوە كەمبوونەوەی دەرمان لە كۆگاكانی نەخۆشخانەكانی شێرپەنجە تەنیا چەند جۆرێكی دیاریكراو بووە، چارەسەری كاتی بۆ كراوە و نەگەیشتووەتە ئاستی مەترسیدار.

لە رونكردنەوەكەدا هاتووە "بەداخەوە بەدڕەوشتیی سیاسی گەیشتووەتە ئەو راددەیەی لایەنێك هاتووە ناسكترین مرۆڤی ئەم وڵاتە كە تووشبووانی شێرپەنجەن بەكاردەهێنێت و دەنگۆی نەمانی دەرمانی شێرپەنجە بڵاودەكاتەوەو كەمپین سازدەكات، لەراستیدا ئەوە كەمپینی كۆكردنەوەی دەنگە نەك كۆمەك بۆ تووشبووانی شێرپەنجە".

سندوقی كۆمەك بۆ توشبوانی شێرپەنجە، بە توندی ئیدانەی بەكارهێنانی نەخۆش و هونەرمەند و كەسایەتییەكانی كوردستان لەو بانگەشە چەواشەكارییەدا دەكات ‌و داوا دەكات دەستبەجێ خۆڵكردنە چاوی خەڵك رابگیرێت و كاری قێزەونی وا دووبارەنەكرێتەوە.

داواش لە هاوڵاتیانی كوردستان دەكات بە كەمپینە چەواشەكارییەكانی ئەو لایەنە و دەزگا راگەیاندنەكەی باوەڕنەكەن.

1170 جار خوێندراوەتەوە