لە چوارچێوەی زنجیرە کۆڕ و سیمینارێکدا، ژوری توێژینەوەکانی بزوتنەوەی گۆڕان سیمینارێکی بۆ دلێر عەبدولخالق، بە ناونیشانی (هەرێمی کوردستان لە چاوەڕوانیی پێکهێنانی دو حکومەتدا) رێکخست.
لە سەرەتادا، رێکخەری ژوری رۆژنامەوانی، تیشکی خستەسەر ئەزمون و مێژوی دروستبونی کابینەکانی حکومەتی هەرێم و ئەو چوارچێوە سیاسیی و ئابوری و ئیداری و قانونیانەی ڕەنگدانەوەی هەبوە لەسەریان، هاوکاتیش پەرەسەندنەکان لە هەرێمدا گرێدرانەوە بە قۆناغەکانی حوکمی عێراق لە دوای ساڵی ٢٠٠٣ و نوسینەوەی دەستور و پێکهێنانی حکومەتی کاتی و ڕاگوزەر و حکومەتە هەمیشەییەکان، لەگەڵ لێکەوتەکانی ئەو بەرەوپێشچونانە لەسەر دۆخی سیاسیی و دارایی و دامەزراوەیی هەرێمی کوردستان.
لە بەشێکی سیمینارەکەدا، کە ژمارەیەکی بەرچاو لە هەڵسوڕاوان لە مەكۆی سەرەكی لە سلێمانی ئامادەی بون، هەڵوەستە لەسەر جێبەجێنەکردنی دەستور و پاشەکشێی دەسەڵاتدارێتی عێراق لە سروشتی فیدڕاڵی و دروستکردنی قەیرانی دارایی و قوڵبونەوەی کێشەکانی هەولێر و بەغدا کرا، تا گەیشتین بە قۆناغی بەهێزەکردنەوەی مەرکەز و لاوازکردنی هەرێم و پاشگەزبونەوەی کرداری لە فۆڕمی فیدڕاڵیزمدا.
پەیوەندیدار بە دۆخی هەرێمی کوردستان، دلێر عەبدولخالق لە سیمینارەکەدا ئاماژەی بەوەكرد كە، گۆڕانکاریەکانی ناوچەکە خێران، دوای هەڵبژاردنی ئەنجومەنی نوێنەران شیعە و سونە خۆیان لە چوارچێوەیەکدا ڕێکخستوە، مایەی ڕەخنەیە لایەنە کوردییەکان بە ناکۆکیی و پەرتەوازەییەوە لە هەرێمەوە بۆ بەغدا سیاسەتەکانیان درێژکردۆتەوە. لەو چوارچێوەیەدا نمونەی بە هەڵبژاردنی خولی شەشەمی پەرلەمانی کوردستان هێنایەوە، کە دورودرێژترین خولە بێ حکومەت و نوێکردنەوەی ڕەوایەتی سیاسیی دامەزراوەکان ماوەتەوە، ئەمەش ئەوپەڕی هەستنەکردنە بە بەرپرسیارێتی و خەڵک باجەکەی دەدات، چونکە لەم هاوکێشەیەدا بەرژەوەندییە باڵاکان نادیدە گیراوە و بەرژەوەندییە کەسی و حزبیەکان جێی گرتووەتەوە.
دوپاتیشی کردەوە، کە دەبێت ئەمجارە کورد لە بەغداد لەبری شەڕی پۆست و پێگە، جەخت لە جێبەجێکردنی ئەو بڕگانەی دەستور بکاتەوە، کە پێویست بوو چەند ساڵ پێش جێبەجێ بکرانایە ، وە شەڕ لەسەر مافە دەستوریەکان و کەرکوک و پێکهێنانی ئەنجومەنی فیدڕاڵی و شایستە داراییەکان بکرایە.