دۆناڵد ترەمپ، سەرۆکی ئەمریکا ڕایگەیاند، ئاسمانی سەر ڤەنزوێلا و دەوروبەری بە تەواوی دادەخرێت، لەكاتێكدا پێشتر هۆشداری بە هێڵە ئاسمانییە گەورەکان درابو لە "دۆخێکی مەترسیدار" لە کاتی فڕین بەسەر ڤەنزوێلادا.

هەواڵ: KNN
 
دۆناڵد ترەمپ،   لە پلاتفۆرمی "Truth Social" بڵاویكردەوە، "بۆ هەمو هێڵە ئاسمانییەکان، فڕۆکەوانان، بازرگانانی ماددە هۆشبەرەکان و قاچاخچییانی مرۆڤ، ئەوە لەبەرچاو بگرن کە ئاسمانی ڤەنزوێلا و دەوروبەری بە تەواوی دادەخرێت".

 هەفتەی ڕابردو دەسەڵاتی فڕۆکەوانی ئەمریکا هۆشدارییان دایە هێڵە ئاسمانییە گەورەکان   لە کاتی فڕین بەسەر ڤەنزوێلادا بەهۆی "خراپبونی دۆخی ئەمنی و زیادبونی چالاکی سەربازی لە ناوخۆ یان دەوروبەری وڵاتەکە".

 
ئیدارەی ترەمپ، زیاتر لە دومانگە هێزی دەریایی و ئاسمانی وڵاتەکەی رەوانەی سنورە ئاویەکانی نزیک فەنزوێلا دەکەن  لە دەریای کاریبی، بەتایبەتی بە جێگیرکردنی گەورەترین کەشتیی فڕۆکەهەڵگری جیهاندا لە ناوچەکە.

 
واشنتن جەخت لەوە دەكاتەوە، ئامانجەکە بەرەنگاربونەوەی قاچاخچێتی ماددە هۆشبەرەکانە، بەڵام کاراکاس دەڵێت ئامانجی کۆتایی گۆڕینی ڕژێمە. لە مانگی ئەیلولەوە، هێزەکانی ئەمەریکا زیاتر لە 20 بەلەمی گومانلێکراو بە قاچاخچێتی ماددە هۆشبەرەکانیان لە دەریای کاریبی و ڕۆژهەڵاتی زەریای هێمن تێکشکاندوە، کە بوەتە هۆی کوژرانی زیاتر لە 83 کەس.