نێردەی ئەمەریکا ناوەڕۆکی کۆبوونەوەی سەرۆکی ئەمەریکا و سوریای بە مەزڵوم عەبدی گەیاند و فەرماندەکەی کورد جەختی لە یەکگرتن کردەوە.


هەواڵ:KNNC


مەزڵوم عەبدی فەرماندەی گشتیی هێزەکانی سوریای دیموکرات-هەسەدە لە تۆڕی کۆمەڵایەتی ئێکس ڕایگەیاند: لەگەڵ تۆم باراک نێردەی ئەمەریکا بۆ سوریا، قسەیان کردوە و باسیان لە ناوەڕۆکی کۆبوونەوەی نێوان هەردوو دۆناڵد ترەمپ سەرۆکی ئەمەریکا و ئەحمەد شەرع سەرۆکی سوریا کردوە.

فەرماندەی هەسەدە ئاماژەی بەوەشداوە، کە لەڕێگەی تۆم باراکەوە سوپاسی دۆناڵد ترەمپی کردوە بۆ سەرکردایەتیکردنی پرسی سوریا و بەرەوپێشبردنی باباتەکانی پەیوەست بە دۆخی وڵاتەکە.

مەزڵوم عەبدی جەختی کردەوە لە پابەندی هێزەکانیان بە تێکەڵبوون بە سوپای سوریا و یەکگرتن لەنێو دامەرزاوەکانی دەوڵەتدا.

لە کۆتاییشدا وتویەتی، لەگەڵ هاوبەشاندا بە هەماهەنگی لە هەوڵی بەردەوامدان لەپێناو داهاتوویەکی خۆشگوزەران و شیاو بە پێکهاتەکانی سوریا و دڵنیاییدان لە سوریایەکی یەکگرتوو...

بەپێی زانیارییەکان، پەیوەندییەکەی نێوان تۆم باراک و مەزڵوم عەبدی، بە دەستپێشخەری نێردەکەی ئەمەریکا بووە و ئەو پەیوەندیی کردوە تا بابەتەکانی کۆبوونەوەکە بۆ فەرماندە کوردەکەی ڕۆژئاوا ڕوونبکاتەوە...