لیژنەی ئاسایش و بەرگری ئەنجومەنی نوێنەرانی عێراق بانگهێشتی ڕاوێژكاری ئاسایشی نیشتمانی كرد لەبارەی لەشكركێشی توركیا و دەڵێت: پێویستە بڕیارێكی نیشتیمانی هەبێت بەرامبەر پێشێلكردنی سەروەریی وڵات.

هەواڵ:KNNC

لیژنەی ئاسایش و بەرگری پەرلەمانی عێراق، بانگهێشتی قاسم ئەعرەجی، ڕاوێژكاری ئاسایشی نیشتیمانی و شاندی یاوەری كرد بۆ تاوتوێكردنی دۆخی ئەمنی عێراق و پێشێلكارییەكانی توركیا.

بەپێی راگەیەنراوێکی لیژنەکە، لەو كۆبونەوەیەدا گفتوگۆكرا لەبارەی لەشكركێشی توركیا و بۆردومانكردنی بەردەوامی هەندێك ناوچە. لیژنەكە بڕیاریدا بە بەردەوامبونی بانگهێشتكردنی بەرپرسانی لایەنە پەیوەندیدارەكان بۆ كۆتاییهێنان بە دەستدرێژیییەکان بۆ سەر خاكی عێراق بەشێوەیەكی یەكجاری، لەپێناو پاراستنی ئاسایش و سەلامەتی هاوڵاتیان و سەروەریی وڵات.

لەراگەیەنراوەکەدا ئەوەش هاتووە، لیژنەی ئاسایش و بەرگری داوای كرد، بڕیارێكی نیشتیمانی یەكگرتو هەبێت لەلایەن سەرجەم سیاسیەكان دژی هەر دەستدرێژیی و پێشێلكارییەک بۆ سەر خاكی عێراق لەلایەن وڵاتانەوە.