كۆچەر بیركار دڵی خەڵكی كوردستانی خۆشكرد

08:12 - 03/08/2018
زانستی

كۆچەر بیركار بەشدارانی تۆڕە كۆمەڵایەتیەكانی كۆ كردەوە
كۆچەر بیركار خەڵاتی فیڵدزی لە بواری بیركاریدا وەرگرت
كۆچەر بیركار: حەزم دەكرد بچومایەتە سەر گڵگۆكەی قانع
كۆچەر بیركار: هەشت ساڵی منداڵیم لە ناو تەنووری شەڕی ئێران و عێراق بەسەربرد


وەرگرتنی خەڵاتێكی جیهانی لەلایەن كۆچەر بیركار زانای كورد زمان ‌و مامۆستای زانكۆی كامبریجی بەریتانیا، خۆشحاڵی خەڵكی كوردستانی لێكەوتەوە، بەجۆرێك لە ماوەی هەفتەیەكدا هاشتاگی كۆچەر رووپەڕی تۆڕە كۆمەڵایەتیەكانی تەنیوە.

كۆچەر لە زنجیرە نوسینێكدا باس لە ژیانی پڕ لە نەهامەتی خۆی دەكات.


"زۆر حەزم ئەكرد هەر ئێستا چوومایەتە سەر گڵكۆكەی قانع و پێموتایە خەمت نەبێ، كوردیش ئەتوانێ پێشكەوێ، پێموتایە قانع تۆ لە كوێ ئاشەوانیت ئەكرد، كۆچەر بیركار لەوێ لە دایك بوو، لەوێ فێری بیركردنەوە بوو، لەوێ خولیای بیركاری بوو. حەزم ئەكرد كێلەكەیم ماچ كردایە و پێم وتایە دە ئیتر بە ئارامی بنوو. زۆر خۆشحاڵم ئەگەر ئەم هەواڵە كەمێ خەمی دڵی هەر كوردو نا كوردێكی رەواندبێتەوە. هیوادرام ئەمە ببێتە هاندەر بۆ زیاتر تێكۆشانی خوێنەری كورد بۆ باشتر ناساندن و رێزگرتنی زانایانی كورد".



ئەمە وتەی پڕۆفیسۆر كۆچەر بیركارە، دوای وەرگرتنی خەڵاتی فیڵدز كە گەورەترین خەڵاتی بیركارییە لە ئاستی جیهاندا.

بە گوزەرێك بە ناو تۆڕە كۆمەڵایەتیەكاندا دەردەكەوێت، كە خەڵاتەكەی كۆچەر دڵی خەڵكی خۆشكردووە، هەریەكە‌و بەجۆرێك خۆشحاڵی خۆی دەردەبڕێت ‌و پیرۆزبایی لێدەكات.


پڕۆفیسۆر كۆچەر بیركار، خەڵكی گوندی نێی شاری مەریوانی رۆژهەڵاتی كوردستانە، یەكێك لە براوەكانی مەدالییا فیڵدزی 2018ەیە. خەڵاتەكە لە كۆنگرەی نێودەوڵەتی بیركاری لە ڕیۆ دی جانیرۆ بەڕازیل پێبەخشرا.



كاتێك سەیری ئەكاونتەكەی كۆچەر بیركار دەكەیت بەدەیان پۆستی بەشدارانی فەیسبوك دەبینرێت كە بۆ ئەكاونتەكەی تاگكراون، تێدا خەڵكانی ئاسایی ‌و حیزب ‌و لایەنە سیاسیی فەرهەنگیەكیانیش پیرۆزباییان لێكردوە.



رەنگە خەڵاتەكەی كۆچەر یەكێك لەو شتە دەگمەنانە بێت كە تا ئێستا بەشدارانی تۆڕە كۆمەڵایەتیەكان لەدەوری خۆی كۆكردبێتەوە، چەند ساڵێكە بەشدارانی فەیسبوك بەسەر لایەنە حیزبیەكاندا دابەشبوون، بەڵام خەڵاتەكەی كۆچەر زۆربەیانی هاوڕا كرد.

كۆچەر بیركار، باس لەسەرەتاكانی ژیانی خوێندنی دەكات ‌و دەڵێت: لە مەریوان خوێندنگە و خوێندن بەشێوەی ئەم سەردەمە مێژوویەكی كۆنی نیە، هەرچەند خوێندنی حوجرە لە زۆر كۆنەوە بووە. دوور بوونی شارەكە لە شارە گەورەكان لە لایەكەوە و كورد بوونی خەڵكەكەی لە لایەكی ترەوە بوونەتە هۆی ئەوەی كە حكومەتەكانی ئێران ئەو ناوچە پەرە پێ نەدەن.



چەند مانگێك دوای لە دایكبوونی شۆڕشی ئێران روودەدات زۆری پێناچێت شەڕی ئێران و عێراق دەستپێدەكات. كۆچی دەڵێت: شەڕەكە پەیوەندی بە كوردەوە نەبوو. شەڕی فارس و عەرەب بوو، بەڵام ماڵی كورد بوو وێران دەكرا. 

كۆچەر لە شەس ساڵیدا لە گوندەكەیان دەست بە خوێندن دەكات قوتابخانەكەیان ماڵێك بووە كراوەتە خوێندنگە. لە قۆناغی سەرەتایدا لە پاڵ خوێندن كاری كشتوكاڵیشی كردوە.

كۆچەر باس لەوە دەكات، یەكەمجار لە پۆلی پێنج هەستیكردوە كە حەز لە بیركاری دەكات. كۆچەر دەڵێت: هەشت ساڵی منداڵی لە ناو تەنووری شەڕی بێ مەعنای ئێران و عێراق بەسەر برد. 

خەڵاتی فێلدز كە بە نۆبڵی بیركاری ناسراوە، لەساڵی 1932ەوە هەر چوار ساڵ جارێك دەبەخشرێت، براوەكان دەبێت لەو ساڵەدا كە خەڵاتەكە وەردەگرن، تەمەنیان كەمتر لە 40 ساڵ بێت و ئەوپەڕی چوار بیركاریزان لە یەك كاتدا خەڵات دەكرێن. كۆچەر ساڵی 2000 وەك پەنابەرێك چووەتە بەریتانیا ‌و ئێستا لەزانكۆی كامبریج مامۆستایە‌و دوای 18 ساڵ لە غەریبی توانی خەڵاتەكە بەدەستبهێنێت.

دانیشتوانی گوندەكەی كۆچەر بیركار، وەرگرتنی خەڵاتەكەیان كردە زەماوەند‌و بە هەڵپەڕكێ‌‌و گۆرانی ‌و دابەشكردنی شیرینی گوزارشتیان لە خۆشی خۆیان كرد.

963 جار خوێندراوەتەوە