سەروەت و سامانى ئیبراهیم تاتڵیساس کێشە دەخاتە نێوان خۆیى و کوڕەکەى، تاتڵیساس کوڕەکەى بە بردنى پارەکانى تۆمەتبار دەکات، کوڕەکەشى دەڵێت: گومانم هەیە لە دۆخى دەرونى و تەندروستى باوکم.

هونەرمەندى گەورەى تورک، ئیبراهیم تاتڵیساس، لە بەرنامەیەکى تەلەفزیۆنیدا هێرشى کردە سەر کوڕە گەورەکەى کە ناوى (ئەحمەد تاتڵیساس)ە و رایگەیاند: دواى هەوڵى تیرۆرکردنم، کە تەقەم لێکرا، کوڕەکەم یەکەم کە کردی چوە سەر قاسەکەم و بەتاڵی کرد و تەواوی پارەکانى بردم.

دەشڵێت" تائێستا حەوت دوکانم داوە بە کوڕەکەم، بەڵام سەرکەوتو نەبوە و زیانێکی زۆری کردوە.

لەبەرامبەردا کوڕەکەى تاتڵیساس لە بەیاننامەیەکدا بۆ رای گشتى رایگەیاند: لەکاتێکدا باوکم، من بە بردنى پارەکانى تۆمەتبار دەکات، بەڵام من لەکاتى برینداربونى باوکمدا لە نەخۆشخانەکانى ئەڵمانیا و تورکیا لەگەڵى بوم و بەوردى چاودێرى تەندروستیم کردووە.

رەتیشى کردەوە کە پارەکانى باوکى بردبێت و لەو بارەیەوە رایگەیاند: دواى روداوى تەقەکردن لە باوکم، بە ئامادەبونى پارێزەر و ژمێریارەکەى باوکم پێکەوە رۆشتوین بۆ دەستنیشانکردنى موڵک و سەروەت و سامانەکەى و لەو کاتەشدا یەک جار قاسەکەمان کردوەتەوە و ئەوانیش ئاگاداربون.

لەبارەى دوکانەکانیش، ئەحمەد تاتڵیساس ئاماژەى بەوەکرد، لەم چەند ساڵانەى دوایدا چەندین کارم کردوە و لە یەک دو ئیش توشى زیان بوم کە هیچ پەیوەندى بەوەوە نییە کە باوکى باسى دەکات.

رەتیشى کردەوە باوکى هیچ دوکانێکى پێدابێت و وتى: هەرچەندە باوکمە، بەڵام پێدانى حەوت دوکان لەلایەن ئەوەوە بەمن دورە لە راستییەوە، تەنانەت باوکم خانویەکیشى نەداوە پێم، بەڵام هەرکاتێک پێویستى بەمن بوبێت لەگەڵى بوم و لەگەڵیشى دەبم.

ئەحمەد تاتڵیساس بە گومانەوە باسى لە رەوشى تەندروستى باوکى کردووە و نوسیویەتى: بەهۆى ئەم قسانەى ئەو من گومانم زیاتر بوە لەسەر تێکچونى رەوشى دەرونى و تەندروستى باوکم.