دەستگیرکردنى یەکێک لە مەترسیدارترین بازرگانەکانى ماددەى هۆشبەر راگەیەنرا

KNN : Kurdish News Network
12:30 - 29/05/2022
کوردستان

دەستگیرکردنى یەکێک لە مەترسیدارترین بازرگانەکانى ماددەى هۆشبەر لە هەرێمى کوردستان راگەیەنرا کە چەندین ساڵە هێزەکانى ئاسایشى بەدواداچونى بۆ دەکەن.

بنکەى نەهێشتنى ماددە هۆشبەرەکانى سۆران رایگەیاند: دواى چەندین ساڵ بەدواداچون و کۆکردنەوەى زانیارى و چاودێرى ورد، سەرەنجام هێزەکانى بنکەى نەهێشتنى ماددە هۆشبەرەکانى سۆران توانیان تۆمەتبار ( س.ع.خ ) یەکێک لە گەورەترین بازرگانەکانى ماددەى هۆشبەر لە هەرێمى کوردستان لە بازگەى گۆجار سەر بە ئیدارەى سەربەخۆى سۆران دەستگیرى بکەن.

ئاشکراشى کردووە، تۆمەتبار خەڵکى ئیدارەى راپەڕینە و دانیشتوى قەلادزێ و وڵاتى ئێرانە و پشکى شێرى هەبووە لە بڵاوکردنەوەى  ماددە هۆشبەرەکان بە هەموو جۆرەکانى کریستال، هێرویین و تریاک لە هەرێمى کوردستان.

دەشڵێت: لە ماوەى ئەم چەند ساڵە هێزەکانى نەهێشتنى ماددە هۆشبەرەکان توانیان دەست بگرن بە سەر رێژەیەکى زۆر لە جۆرەکانى ماددەى هۆشبەر و حەبى هۆشبەر و چەندین ئۆتۆمبێل و دەستگیر کردنى ژمارەیەکى زۆر لە ئالوودەبووان و فرۆشیارانى ماددەى هۆشبەر کە کاریان بۆ ( س.ع.خ ) کردووە.

بنکەى نەهێشتنى ماددە هۆشبەرەکانى سۆران باسى لەوەشکردووە، ناوبراو سەرپەرشتى باندێکى گەورەى هاوردە کردن و بڵاوکردنەوەی ماددە هۆشبەرەکانى دەکرد و  بەدەستگیرکردنى ئەم بازرگانە، ماددەى هۆشبەر لە سنورى پارێزگاى هەولێر بە شێوەى بەرچاو رو لە کەم بون دەکات.

2204 جار خوێندراوەتەوە