سەرۆکی هاوپەیمانیی فەتح، لەبارەی گفتوگۆکانی پێکهێنانی حکومەت ‌و کێشەکانی چوارچێوەی هەماهەنگی ‌و رەوتی سەدر، سەردانی موقتەدا سەدر، دەکاتەوە.

سەرچاوەیەک لە چوارچێوەی هەماهەنگی بە میدیاکانی راگەیاند: بڕیارە ئەمڕۆ هادی عامری، سەرۆکی هاوپەیمانیی فەتح ‌و سەرکردە لە چوارچێوەی هەماهەنگی، سەردانی موقتەدا سەدر رێبەری رەوتی سەدر بکات لە شاری نەجەف.

ئەو سەرچاوەیە وتوشیەتی: سەردانەکەی عامری، بۆ درێژەدانە بە گفتوگۆکانی چوارچێوەی هەماهەنگی ‌و رەوتی سەدر لەپێناو گەیشتن بە رێککەوتن لەبارەی پێکهێنانی حکومەتەوە.

سەردانیکردنەوەی عامری بۆ لای سەدر لەکاتێکدایە، سەدر جەخت لە پێکهێنانی حکومەتی زۆرینە دەکاتەوە ‌و ڤیتۆی لەسەر بەشداریی مالیکی لە پرۆسەی پێکهێنانی حکومەت هەیە کە خاوەنی زۆرترین کورسیی پەرلەمانە لە ناو چوارچێوەی هەماهەنگی.