گرانبوونی غاز سۆماڵییەکان ناچار دەکات بگەڕێنەوە بۆ سەردەمی خەڵووز

KNN : Kurdish News Network
10:11 - 10/01/2022
جیهان

گرانبوونی نرخی غاز لە سۆماڵ، زۆربەی سۆماڵییەکان ناچار دەکات، بگەڕێنەوە بۆ سەردەمی خەڵووز ‌و بەناچاری خەڵووز بەکاربێنن بۆ چێشت لێنان.

 

سۆماڵ، وڵاتێکە لە سەرەوەی گەندەڵترین وڵاتانی جیهان کە هەر بەو هۆیەوە رۆژ بە ڕۆژ، ژیانی هاوڵاتییەکانی، سەختتر دەبێت.

 

بەهۆی گرانبوونی نرخی غازەوە، زۆرێک لە خێزانە سۆماڵییەکان ناچار بوون بۆ چێشتلێنان، پەنا ببەنە بەر بەکارهێنانی خەڵووز.

 

نرخی غاز لە سۆماڵ، لە نیوەی دوەمی ساڵی رابردوەوە، 75٪  بەرز بوەتەوە ‌و ئەوەش بوە هۆی ئەوەی زۆربەی خێزانەکان نەتوانن بیکڕن ‌و کۆمپانیاکانیش ئاستەنگانی بەردەم بازرگانیکردن کەرتی غاز، بە هۆکاری گرانبوونی نرخەکەی دەزانن.

 

هاوکات شارەزایەکی ئابووری لەو وڵاتە رایگەیاند: ئەگەر نرخ لە بازاڕی جیهانیش، جێگیر ببێت یان دابەزێت، لە سۆماڵ هەر بە گرانیی دەمێنێتەوە، چونکە بە وتەی ئەو، کۆمپانیاکانی غاز لە وڵاتەکە، دەیان هۆکار دەخولقێنن بۆ گرانکردن ‌و لەو بارەوە بەردەوام خەریکی فێڵکردنن لەگەڵ خەڵک.

 

ژنێکی سۆماڵی، بۆ ئاژانسەکان دەڵێـت: گرانبونی نرخی غاز، هێندەی تر نەهامەتییەکانی زیاد کردون، چونکە ئێستا بوتڵێک غاز بە 41 دۆلار دەکڕن، لە کاتێکدا پێشتر بە 21 دۆلار بوە.

 

ئەو ژنە دەشڵێت، بەناچاریی پەنا دەبەنە بەر خەڵووز بۆ چێشتلێنان ‌و جەختیشی کردوتەوە، پێشتر بە پاشەکەوتی رۆژانەی چەند قروشێک، دەیان توانی بوتڵێک غاز بکڕن، بەڵام ئێستا چاریان نییە ‌و تەنها رێگایان ئەوەیە، خەڵووز بەکار بهێنن.

 

رێگرییەکانی حکومەت لە بازرگانیی ئەو کەرەستەیە ‌و کەمبوونەوەی دار بۆ بەرهەمهێنانی خەڵوز، کارێکیان کردوە، نرخی خەڵووزیش گران بێت.

 

سۆماڵ کە بەپێی دوایین ئامار، ژمارەی دانیشتوانەکەی نزیکەی 11 ملیۆن کەسە، نزیکەی 70 %ی خەڵکەکەی، لە ژێر هێڵی هەژارییەوە دەژین ‌و کە لە دوای سەرهەڵدانی شەڕی ناوخۆە لە سەرەتای هەشتاکانەوە لە وڵاتەکە، گەندەڵی سەرجەم کەرتەکانی ژیانی لە سۆماڵ گرتوەتەوە‌ و لەو کاتەوە ژیانی سۆماڵییەکان رۆژ بەرۆژ قورستر دەبێت.

130 جار خوێندراوەتەوە