ئەنجامى ژماردنەوەى دەستى دەنگەکان بەشێک لەشیعەکان توشى شۆک دەکات

KNN : Kurdish News Network
09:19 - 30/10/2021
ڕاپۆرت

رۆژى پێنجشەممە ژماردنەوەى دەستى دەنگەکانى ئەو وێستگانەى پارێزگاى بابل کۆتایى هات کە تانەیان لێدراوە، ژماردنەوەى دەنگەکانیش بەرێژەى (100%)هاوتاى ئەو ئەنجامە بوو کە پێشتر کۆمسیۆنى هەڵبژاردنەکان رایگەیاندبوو.

             ئەنجامى تانەکان هاوپەیمانى فەتح شۆک دەکات
ئەو پێشهاتە هێندەى ترئەولایەنانەى توشى شۆک کرد کە پێیانوایە ساختەکارى لەهەڵبژاردندا کراوە و یارى بە دەنگەکان کراوە، هاوپەیمانى فەتحیش (باڵى سیاسى حەشدى شەعبى) کە لەم هەڵبژاردنەدا گورزى کاریگەرى بەرکەوتوە و ژمارەى کورسییەکانى بۆکەمتر لە نیوە دابەزیوە، لەهەموو لایەنە ناڕازییەکان لەو ئەنجامە نوێیانە ناڕازى ترە و هەڕەشەى بەرزکردنەوەى ئاستى ناڕەزاییەتیەکانیان دەکات.

       فەتح ئۆباڵى دۆڕاندنەکەى دەخاتە ئەستۆى کۆمسیۆنى هەڵبژاردن
دواین هەڵوێستى ئەو هاوپەیمانیەش یاداشتێکى (22) خاڵیە کەئاراستەى دەسەڵاتى داوەرى کردوە کە تێیدا ئاماژەى بەو پێشیلکاریانە کردوە کە لە هەڵبژاردندا ئەنجامدراون و بە راستەوخۆش کۆمسیۆنى باڵاى سەربەخۆى هەڵبژاردنەکانى بە ئەنجامدانى ئەو پێشێلکاریانە تۆمەتبارکردوە و داواى  دادگایى کردنیانى کردوە.

ئەو یاداشتە و لێدوانى ئەندامانى هاوپەیمانى فەتح ئاماژەیە بۆ ئەوەى ژماردنەوەى دەستى بەشێک لە ویستگەکان لە ئاستى ناڕازى بوونى ئەوانى لە ئەنجامى هەڵبژاردنەکان کەم نەکردوەتەوە.

موختار موسەوى، ئەندامى هاوپەیمانى فەتح لەوبارەیەوە دەڵێت، نەبونى جیاوازى لە نێوان ژماردنى دەستى و ئەلکترۆنى دەنگەکان گومانەکان لەسەر پاکى هەڵبژاردنەکە زیاتر دەکات.

باسى لەوەشکردوە، ئەنجامى تانەکان وهاوتابوونى دەنگەکان ئەو پیلانگێڕیە دەردەخات کە لە دژى گەلى عێراق ئەنجام دەدرێت لە رێگەى دزینى دەنگەکانیانەوە.

بەپێى راگەیەنراوى فەرمى کۆمسیۆنى هەڵبژاردنەکانى عێراق، (1277) تانە لە ئەنجامى هەڵبژاردنەکانى دراون، لەو ژمارەیەش تەنها (46) تانەیان قبوڵکراوە لەوچوارچێوەیەشدا کۆمسیۆنى بڕیاریدا دەنگەکانى (800) وێستگە لە پارێزگاکانى بەغدا، بەسرە، موسەنا، زیقاڕ، هەولێر وسەڵاحەدین بەدەست بژمیردێنەوە.

           تانەى بێ بەڵگە
لاى کۆمسیۆنى هەڵبژاردنەکان، بونى بەڵگەى سەلمێنەر بنەماى قبوڵکردنى ئەو تانانە بوو کە لە ئەنجامى هەڵبژاردنەکان دراون.

بەپێى زانیارییە رۆژنامەوانییەکان ئەولایانانەى کە لە ئەنجامى هەڵبژاردنەکان ناڕازى بوون، بەڵگەى بەهێزیان پێشکەش نەکردوە کە ئەنجامدانى پێشێلکارى و یارى کردن بە دەنگەکان بسەلمێنیت، زۆربە تانەکان لەوچوارچێوەیەدا بووە کە کاندیدەکان بڕوایان بەژمارەى ئەو دەنگانە نەبووە کە بەدەستیان هێناوە لەو حاڵەتەشدا بەبی ئەوەى بەڵگەیەکى یاساییان لەبەردەستدا بێت تانەیان لە ئەنجامەکان داوە.

دواین هەوڵى ئەو لایەنانەى کە لە ئەنجامەکانى هەلبژاردن و ئەنجامى تانەکانیش نارازین بەرفراوانکردنى خۆپیشاندانەکان وبەرزکردنەوىە ئاستى داواکارییەکانیانە بۆ دووبارەکردنەوەى هەڵبژاردن و گۆڕانکارى لە هەیکەلى کۆمسیۆنى باڵاى سەربەخۆى هەڵبژاردنەکان.

ئامادەکردنى - نەبەز محەمەد

4243 جار خوێندراوەتەوە