وشكبونی هۆرەكان.. منداڵان قوربانی سەرەكی گرفتە گەورەكەی عێراق

KNN : Kurdish News Network
09:04 - 26/10/2021
عێراق

كەمی ڕێژەی باران بارین و سیاسەتی ئاوی توركیا و ئێران بەرامبەر عێراق، رێژەی ئاوی هەردوو روباری دیجلە و فوراتی كەمكردووەتەوە، هۆرەكان كە ناوچەیەكی گرنگی عێراقە و لەسەر ئاستی جیهانیش لەناو لیستی شوێنە كلتورییەكانی یونسكۆدایە، پشكی شێری ئەو مەترسییەی بەركەوتوە و نزیكە لەوەی بێ ئاو و بێ دانیشتوان بمێنێتەوە.

 

دابەزینی ئاستی ئاوی دیجلە و فورات ژیانی سەدان خێزان و منداڵەكانیانی خستوەتە مەترسییەوە، ئەوەش بەهۆی كەمبونەوەی ئاوی هۆرەكان كە ناچاریان دەكات ناوچەكانیان جێبهێڵن.

گەڕان بەدوای ئاودا؛ بووە بە خواستی سەرەكی ئەو هاوڵاتیانەی لە هۆرەكان نیشتەجێن، ئەوان دەبێت لەنێوان مانەوە لە زێدی خۆیان لە ژیانێكی كولەمەرگیدا و كۆچكردن، بژاردەیەك هەڵبژێرن.

منداڵان قوربانی سەرەكی

 
ئەو خێزانانەی لەو ناوچانە نیشتەجێن خاوەنی منداڵێكی زۆرن، بۆیە ئەوان دەبنە قوربانی سەرەكی ئەو ڕووداوە كە سیاسەت و كەشوهەوا بەسەری هێناون.

حەسەن فالح یەكێك لە منداڵەكانی نیشتەجێى هۆرەكان ئاماژە بەوە دەكات، ئاو زۆر كەمبۆتەوە، خراپبوە و ڕەنگی سور بووە، ئەگەر ئەم وشكە ساڵییە بەردەوام بێت، یان بیر هەڵدەكەنین یاخود دەبێت كۆچ بكەین و ناوچەكە جێبهێڵین.


"دراوسێكانمان ئاژەڵەكانیان لەدەستداوە بەهۆی بەرزبونەوە پلەی گەرماوە، یەكێكیان ئاژەڵەكەی بەهۆی گەرماوە خەریكبوو مردار دەبۆوە، بۆیە ناچار سەریانبڕی، پێشتر چوار ملیۆن و پێنجسەد هەزار دینیاریاندابوو بە ئاژەڵێك، بەڵام گۆشتەكەی بە چوارسەد هەزار فرۆشت، جیاوازییەكی زۆر هەیە" حەسەن وادەڵێت.

ئەو منداڵە باسی لەوەكردووە، ئەگەر سەرچاوەیەكی ئاوی خاوێنمان بۆ نەدۆزنەوە هەمووان دەمرین.

حەسەن هەر خۆی نییە كە لەو دۆخەدا دەژی، بەڵكو بەپێی ڕاپۆرتێكی ڕێكخراوی نەتەوە یەكگرتووەكان زیاتر لە یەک ملیار منداڵ لە جیهاندا، گۆڕانكاری كەشوهەوا كاریگەری لەسەر ژیانیان دەبێت، 920 ملیۆنیان بە ئەستەم ئاوی خواردنەوەیان دەست دەكەوێت، عێراقیش لە پلەی 61 دایە لەسەر ئاستی جیهان بۆ ئەو گرفتە.

ئەو خێزانانەی لە هۆرەكان نیشتەجێن، ئێستا یەكێك لە كێشەكانیان دابینكردنی ئاوە بۆ منداڵەكانیان، چونكە بەو هۆیەوە ناچار دەبن كۆچ بكەن، ئەوەش كاریگەری لەسەر خوێندن و داهاتوی منداڵەكانیان دەبێت.

حەبیب عەباس كە یەكێكە لە دانیشتوانی ئەو ناچەیەی باشوری عێراق دەڵێت: "ئەگەر ئاستی ئاوی هۆرەكان كەمبێتەوە، ئاژەڵەكان مردار دەبنەوە، سامانی ماسی لەناو دەچێت، ئێمە خەڵكانێكین بژێوی ژیانمان لەسەر ئاژەڵداری و سامانی ماسییە، بەتایبەت بەرهەمی شیر، بۆیە ئەگەر ئاو نەبێت ناچارین لە شوێنێكەوە بڕۆین بۆ شوێنێكی تر".

ئەو پیاوە باسی لەوەكردووە، ئەوان كەمینەیەكن لە هۆرەكان ماونەتەوە، زۆرینە چون بۆ ناوچەیەكى سەر روباری فورات، چونكە لێرە ئاو نییە، ئەوەش زیان بە ئاژەڵەكانیان دەگەیەنێت، خەڵكانێكی زۆریش گامێشەكانیان لەدەستداوە كە ئاژەڵی سەرەكی ئەو ناوچەیەن.

توركیا و ئێران بەهۆی گۆڕانكارییەكانی كەشوهەواوە دەستیان كردووە بەدروستكردنی چەندین بەنداوی گەورە لەسەر روبارەكانی دیجلە و فورات، ئەوەش رێژەی وشكەساڵی لە باشوری عێراق زۆر زیاتركردووە، سوێربونی ئاوەكە هەزاران هێكتار زەوی لە كشتوكاڵ خستووە.

235 جار خوێندراوەتەوە