دانیشتوانى ناوەڕاست و باشوری عێراق بەیانی جەژن چی دەخۆن؟

KNN : Kurdish News Network
02:22 - 13/05/2021
تەندروستی

عێراق یەكێكە لەو وڵاتانەی چەند نەتەوە و ئاینزا و كەمە نەتەوایەتی جیاوازی تێدا دەژی، ئەوەش وایكردووە یادكردنەوەی جەژن و بۆنەكانی بەپێی كلتوری نەتەوەكان جیاواز بێت.

 

لای هەمووان ئاشكرایە لە هەرێمی كوردستان زۆرینەی ماڵەكان برنج و قەیسی و فاسۆلیا و بامێ، لەگەڵ گۆشتی سور و گۆشتی پەلەوەرەكانی وەك مریشك قەل بۆ بەیانی یەكەم ڕۆژی جەژن ئامادە دەكەن، ئەوەش بووە بە كلتورێكی سەدان ساڵە.

 

توركمانەكان كە زۆرینەیان لە شاری كەركوك و هەولێر نیشتەجێن، هاوشێوەی كوردەكان بەیانی جەژن چێشت ئامادە دەكەن، ئەوەی لای ئەوان گرنگە هەبونی جۆرێكی گۆشتە لە ژەمی جەژندا، هەروەها ئامادەكردنی حەشوەی كشمیش و بادەم بۆ سەر ئەو برنجەی لە بەیانی جەژندا دەخورێت.

 

عەرەبەكانی ناوەڕاست و باشوری عێراق جیاوازترن و برنج و شلە بۆ ژەمی بەیانی جەژن ئامادە ناكەن، ئەوان گرنگی بە خواردنێك دەدەن كە یەكێكە لە خواردنە كلتورییە عێراقییەكان، ئەویش كاهی و قەیماغە.

 

بەیانی یەكەم ڕۆژی جەژن دوكانەكانی تایبەت بە دروستكردن و فرۆشتنی كاهی جەمەیان دێت و دەیان كەس لە سەرەدا وەستاون بۆ ئەوەی كاهی گەرم و تازە بەرنەوە، لەگەڵیشدا قەیماغ دەخۆن كە یەكێك لە بەرهەمە شیرەمەنییەكان.

 

كاهی مێژوویەكی كۆن هەیە، لە هەویرێكی سادە و تەنكی چەند چین پێكدێت كە لە فڕندا دەبرژێندرێت، دوای هێنانە دەرەوە و لەتكردنی شیلەی بەسەردا دەكرێت و لەگەڵ قەیماغەكەدا دەخورێت.

 

عەرەبەكان جگە لە بەیانی یەكەم ڕۆژی جەژن، ڕۆژانی هەینی و لەكاتی بونی میوانی تایبەت و كەسانی ئازیز و خۆشەویست، كاهی و قەیماغ لەسەر سفرەی بەیانیان دادەنێن.

999 جار خوێندراوەتەوە