پارێزەری دۆسیەی سێوان قادر: بڕیاری لە سێدارەدان بۆ تاوانباری دۆسیەکە پەسەندکرا

KNN : Kurdish News Network
03:48 - 19/04/2021
کوردستان

دوای تێپەڕبونی چەند مانگێک بەسەر کۆتا دانیشتنی دادگای سلێمانی یەک، لەبارەی دۆسیەی سێوان قادر و منداڵەکانی، کە دادوەر بڕیاری لە سێدارەدانی هاوسەرەکەی دەرکرد، دادگای پێداچونەوەی هەرێمی کوردستان پاش پێداچونەوە؛ بڕیاری لە سێدارەدانەکەی پەسەندکرد.

 
سامی ساتی یەکێک لە پارێزەرانی دۆسیەی سێوان قادر بە دیجیتاڵ میدیای (KNN)ی راگەیاند، لە بەرواری (5/4/2021) دادگای پێداچونەوەی هەرێمی کوردستان بڕیاردا بە پەسەندکردنی بڕیاری دادگای تاوانەکانی سلێمانی-1 سەبارەت بە لە سێدارەدانی (دیار مەجید) هاوسەری سێوان قادر.

 

وتیشی، دادگای پێداچونەوە ئەرکی جێبەجێکردنی نییە بەڵکو پەسەندکردنی بڕیارەکانی دادگایە، بۆیە بڕیاری لە سێدارەدانەکەی بە بڕیارێکی راست و دروست لە قەڵەم داوە و پەسەندی کردووە.

 

لە رۆژی (16/12/2018) لە روداوێکدا لە گەڕەکی ئاسوده‌ی قەزای چه‌مچه‌ماڵ، سێوان قادری تەمەن (23) ساڵ و هەر سێ منداڵەکەی لە ماڵەکەی خۆیاندا سوتان، منداڵەکانی هەر ئەوکات گیانیانلەدەستدا، بەڵام سێوان قادر دوای هەشت رۆژ مانەوە لە نەخۆشخانە گیانی لەدەستدا و پێش گیانلەدەستدانیشی هاوسەرەکەی بە سوتاندنیان تۆمەتبارکرد و 11ی ئابی ساڵی رابردو تۆمەتەکە بەسەر هاوسەرەکەیدا یەکلایی بوەوە دادگا تۆمەتباری کرد و سزای لەسێدارەدانی بۆ دەرکرد، بەڵام لەئێستادا لە سێدارەدان بەشێوەیەکی "عورفی" راگیراوە و تەنها سەرۆکایەتی هەرێم دەتوانێت بڕیار بۆ لەسێدارەدان دەربکات، بۆیە ئەو کەسانەی بڕیارەکەیان بۆدەردەچێت وەک زیندانی هەتاهەتایی لەهەرێمی کوردستان مامەڵەیان لەگەڵ دەکرێت.

 

سلێمانی/ بڕیار نامیق

770 جار خوێندراوەتەوە