گێچەڵ.. رۆژنامەنوسە ژنەكانی مۆندیالی روسیا هەراسان دەكات

09:22 - 10/07/2018
وەرزش

خانمانی رۆژنامەنوس لە روسیا كەمپەینی بەرەنگاربونەوەی گێچەڵیان راگەیاند

لەكاتی رووماڵكردنی رووداوەكانی مۆندیالی 2018ی روسیا، بەشێك لە خانمە رۆژنامەنوسەكان لەلایەن هاندەری هەڵبژاردەكانەوە رووبەڕوی گێچەڵ پێكردن دەبنەوە ‌و لە پەخشی راستەوخۆدا بێزار دەكرێن، زۆربو‌ونی حاڵەتەكان وای لە ژمارەیەك خانمانی رۆژنامەنوس كرد كەمپینێكی تایبەت بەم بابەتە رابگەیەنن.

سەرپەرشتیارانی كەمپەینەكە ژمارەیەك رۆژنامەنوسی خانمی بەڕازیلین، لە كاتی گواستنەوەو پەخشی راستەوخۆی رووداوەكانی مۆندیالدا لەلایەن هاندەرانەوە گێچەڵیان بەرامبەر كراوە.

بە وتەی سەرپەرشتیاران، ماوەی چەندین ساڵە خانمانی رۆژنامەنوس لە كاتی گواستنەوەی هەواڵە وەرزشییەكاندا بەبێ ویستی خۆیان ماچ دەكرێن و باوەشیان پێدا دەكرێت، تەنانەت وتەی نەشیاویشیان بەرامبەر بەكار دەهێندرێت.

لە سەرەتادا، چەند رۆژنامەنوسێك لە گروپێكی واتس ئاپەوە دەستیان پێكرد. لەگەڵ زیادبوونی ژمارەی ئەندامانی گروپەكەو باسكردنی هەریەك لە حاڵەتەكان، لە مانگی سێی ئەمساڵدا بڕیاری راگەیاندنی كەمپەینێكیاندا لەژێر ناونیشانی (#رێگەی-بدە-كارەكەی-بكات).

لە مۆندیالی روسیادا، تاكو ئێستا لانی كەم چوار حاڵەتی تۆمار كراو روویداوە كە تیایدا هاندەرانی هەڵبژاردەكان بەبێ ویستی خانمە رۆژنامەنوسەكان گێچەڵیان پێ كردوون.

ئەلین ناستاری، رۆژنامەنوسی وەرزشی:
"هەمیشە ئەم حاڵەتانەمان لای خۆمان دەهێشتەوەو لەگەڵیاندا دەژیاین، بەڵام كاتێك كە دەری دەبڕیت، هەست دەكەیت بە تەنها نیت و كەسانێكی زۆری وەك تۆ هەن كە بە هەمان حاڵەتدا تێدەپەڕن. ئەمە دەپێتە پشتیوان بۆت تاكو لەپێناویدا بجەنگیت. پێموایە كە كەمپەینی (رێگەی بدە كارەكەی بكات) ئەم خاڵە دەخاتە روو و نیشانی دەدات كە ئێمە یەكگرتووین و بەیەكەوە پێیدا تێدەپەڕین. چیتر ئەمە قبوڵ ناكەین".

گابرێلا مۆریرا، رۆژنامەنووسی وەرزشی:
"یەكێك لەو كارانەی كە لای من زۆر سەرنج ڕاكێش بوو، وەڵامەكەی جولیا گویماریس بوو، كە من پێی دەڵێم كار بۆ هۆشیاركردنەوەی دەسەڵاتداران. هۆكاری ئەوەی كە دەڵێم هۆشیاركردنەوە، ئەوەیە كە پێویست بە دانانی یاسایەكی نوێ ناكا ت تایبەت بە ڕێزگرتنی خانمانی رۆژنامەنووس لەسەر كارەكانیان، چونكە ئەم یاسایانە بوونیان هەیە، بەڵام جێبەجێكردنیان داواكراوە".

یەكێك لەو حاڵەتانەی مۆندیال كە سەرنجی میدیاكانی جیهانی بەلای خۆیدا راكێشا، كاردانەوەی جولیا گویماراسی رۆژنامەنوسی بەرازیلی بوو، بۆ ئەو هاندەرەی لە كاتی خۆ ئامادەكردنی ناوبراو بۆ پەخشی راستەوخۆ هەوڵی ماچكردنی داو جولیا بە توندی رووبەڕووی بوویەوە و پێی وت: ئەمە بێڕێزییە، هیچ كاتێك وا مەكە، هیچ كات ئەم كارە بەرامبەر خانمان مەكە".

جولیا لە تویتەرەكەی خۆیدا سەبارەت بە رووداوەكە نوسیویەتی: "ناخۆش و شەرمهێن بوو".

3169 جار خوێندراوەتەوە