وێنە؛ بایدن ئەم گۆڕانكارییانەی لە دیكۆری نوسینگەی كۆشكی سپیدا ئەنجامداوە

KNN : Kurdish News Network
09:50 - 23/01/2021
جیهان

سەرۆكەكانی ئەمریكا لەكاتی وەرگرتنی دەسەڵاتدا و چونیان بۆ ناو كۆشكی سپی، یەكێك لە كارەكانیان ئەنجامدانی گۆڕانكارییە لە دیكۆری نوسینگەی سەرۆك لە كۆشكی سپی، لەو ڕێگایەوە دەیانەوێت شوێن دەستی خۆیان و كەسایەتییەكان هەروەها شێوازی سیاسەتی حكومڕانی نیشان بدەن.

 

 
جۆ بایدن سەرۆكی نوێی ئەمریكا دوای چەند كاتژمێرێكی كەم لە دانانی وەك سەرۆك، دەستی كرد لە گۆڕانكارییەكان، چەندین وێنەی سەرۆك و كەسایەتییە دیارەكانی ئەمریكای لە ژوورەكەیدا هەڵواسی، هەروەها چەند هێما و نیشانەیەكیشی لابرد كە دۆناڵد ترەمپ لەوێ هەڵیواسیبوون و داینابوون.

 

بەپێی ڕاپۆرتێكی ڕۆژنامەی واشنتۆن پۆستی ئەمریكی، تیمەكەی بایدن وێنەیەكی ئاندرۆ جاكسۆن سەرۆكی پێشوتری ئەمریكایان لە ژوورەكە لابردووە كە ترەمپ وەك گەورە و مامۆستای خۆی دەیبینی، ئەمە جگە لەوەی چەندین پەیكەر و وێنەی كەسایەتییە مێژوویەكانی ئەمریكا لە ژوورەكەدا دانراون.

 

دەسەڵاتدارە نوێكەی كۆشكی سپی وێنەیەكی گەورەی فرانكلین ڕۆزفێڵت بەرامبەر مێزی نوسینگەكەی هەڵواسیوە، كە لە سەردەمی حكومڕانیدا ئەمریكای چەندین لە چەندین كێشە و قەیران ڕزگاركردووە، ئەمە جگە لە هەڵواسینی وێنەی سەرۆك تۆماس جیفرسۆن لەگەڵ ئەلیكساندەر هامڵتۆن وەزیری پێشوتری گەنجینە، دانانی ئەو وێنانەش لە نزیك یەكتر وەك هێمایەكە بۆ لێك نزیككردنەوەی بیروبۆچونە جیاوازەكان، چونكە مێژووی ئەمریكا چەندین ململانێی ئەو دوو لایەنەی تێدایە.

 

 هاوكات لە ژوورەكەدا پەیكەری مارتن لۆسەر كینگ جۆنیۆر، ڕۆبەرت كیندی لە نزیك ئاگردانی نوسینگەكەوە دانراون.

 

جۆ بایدن چەند پەیكەرێكی دیكەی ئەو كەسایەتییانەی داناوە كە ڕۆڵ و كاریگەری زۆریان هەبووە لە وڵاتەكەدا لەوانە چالاكوانی مافی كرێكاران سیزار چافیز،چالاكوانی مەدەنی ڕۆزا پاركس، ئیلیانور ڕۆزفێڵت خانمی پێشوتری ئەمریكا، لەگەڵ دانانی داتاشراوێك كە هێمایە بۆ خێڵە ڕەسەنەكانی نیشتەجێی ئەمریكا.

 

یەكێكی دیكە لەو پەیكەرانەی لە ژوورەكەدا دانراوە، بنیامین فرانكلین، كە بە باوكی دامەزراندنی ئەمریكا دادەنرێت، پەیكەركەش هێمایە بۆ گرنگی و كاریگەری زانست لەسەر پێشخستنی وڵات.

 

فەرشی ژوورەكە كە بە نوسینگەی سپیایی ناسراوە، ڕەنگەكەی گۆڕاوە بۆ شین و لۆگۆی سەرۆكایەتی ئەمریكا لە ناوەڕاستەكەیدا دانراوە، ئەوەش هەمان ئەو دیزاینەیە كە سەرۆك بیل كلینتۆن پێشتر داینابوو، هەروەها پەردەكان كراون بە زەردی ئاڵتونی بەڵام پێشتر لەكاتی حكومڕانی ترەمپدا ڕەنگی پەردەكان سوربوون، كە هەمان ڕەنگ و هێمای كۆمارییەكانە.

 

یەكێكی دیكە لە شتە سەرنجڕاكێشەكان، پارچە بەردێكی سەر مانگە كە ئاژانسی ناسا لەسەر داوای بایدن پێشكەشی نوسینگەكەی سەرۆكی كردووە لە ناو كۆشكی سپی.

 

1103 جار خوێندراوەتەوە