لە (2021) چەند مۆبایلێکی زیرەک دەخرێنە بازاڕەوە

KNN : Kurdish News Network
10:07 - 10/01/2021
زانستی

ساڵی 2020 كۆتایی هات و عاشقانی تەكنەلۆژیا و ئامێر و مۆبایلە زیرەكەكان لەچاوەڕوانی ئەوەدان لەمساڵدا چ بابەتێكی نوێ دەخرێتە بازاڕەوە.

 

 ماڵپەڕی نیو ئەتڵەس كە تایبەتە بە هەواڵی تەكنەلۆژیا و ئامێرە زیرەكەكان، لەڕاپۆرتێكیدا باسی لەو مۆبایلانەی كردووە كە لەمساڵدا بڵاودەكرێنەوە و بەهۆی تایبەتمەندێتییەكانیان پێشبینی دەكرێت كڕیارێكی زۆریان هەبێت.


گالەكسی ئێس 21

 

شارەزایانی مۆبایلی سامسۆنگ پێشبینی دەكەن كۆمپانیا بەناوبانگەكەی كۆریای باشور، لەناوەڕاستی ئەم مانگەدا مۆبایلی گالەكسی ئێس 21 بڵاوبكاتەوە، بەوەش دەبێتە یەكەم مۆبایلی زیرەكی بڵاوكراوەی ساڵی نوێ.

 

مۆبایلەكە بەسێ بەرهەمهێنانی جیاواز دەبێت، ئەوانیش ئێس 21 كە پێوانەی شاشەكەی 6.2 ئینجە، هەروەها ئێس 21 پڵەس بە شاشەیەكی گەورەتر كە 6.7 ئینجە، دواهەمینیشیان  ئێس 21 ئەڵترا كە پێوانەی شاشەكەی 6.8 ئینجە.
مۆبایلەكان كامێرایەكی زۆر بەهێزیان هەیە كە توانای زوومەكەی 10 ئێس دەبێت، هەروەها قەڵەمێكی زیرەكی لەگەڵدایە.

 

گالەكسی ئێس 21 نوێترین سیستمی چارەسەری تێدایە كە بە سناپدراگۆن 888 ناسراوە، هەروەها تێكڕای نوێكردنەوەی شاشەكەی بە نزیكەی 120 هێرتز دەبێت.

 

 

پێشبینی دەكرێت هەر لەمساڵدا سامسۆنگ مۆبایلێكی دیكە بخاتە بازاڕەوە كە توانای چەمانەوەی هەیە.

 

ئایفۆن 13

 

كۆمپانیای بەناوبانگی ئەپڵ ساڵانە بەرهەمی نوێی ئایفۆنی هەیە و بۆ 2021 پێشبینی دەكرێت ئایفۆن 13 بڵاوبكاتەوە، بەپێی پێشبینییەكان چارەسەری سەرجەم ئەو كێشانە دەكات كە ئایفۆن 12 هەیبووە.

 

ماڵپەڕی فۆربسی ئەمریكی لە زاری جۆن برۆسر كە شارەزایەكی تایبەتی ئایفۆنە و بەردەوام دزە بە زانیارییەكانی كۆمپانیاكە دەكات باسی لەوە كردووە، شاشەی ئایفۆنەكە نوێكە (LTBO) دەبێت، كە وێنەیەكی زۆر جوان و ڕوونی دەبێت، بێ ئەوەی كاریگەری لەسەر توانای پاترییەكەی هەبێت.

 

برۆسەر دەلًێت "ئایفۆن 13 دەبێتە ڕكابەرێكی بەهێزی ئەو مۆبایلانەی بە سیستمی ئەندرۆید كاردەكەن، بەتایبەت لەڕووی بەهێزی پاتری و بەرگەگرتنی بۆ ماوەیەكی زۆر بێ بارگاوی كردنەوە".

 

مۆبایلە نوێكە سیستمی وای فای 6 تێدایە كە خێراییەكی زۆری هەیە و دەگاتە 9.6 گێگابایت لە چركەیەكدا، لەگەڵ چەند تایبەتمەندییەكی دیكە، هەروەها پێشبینی دەكرێت مۆبایلەكە توانای چەمانەوەی هەبێت، لەئێستاشدا ئەپڵ سەرقاڵی تاقیكردنەوەكانی ئەو چەمانەوە و نەرمی ئامێرەكەیە، چونكە ئەوە گرنگییەكی زۆری هەیە لەم سەردەمەدا و لەو ئامێرانەدا بەتایبەت.

 

پكسڵ 6 و پكسڵ 5 ئای لە گۆگڵەوە

 

كۆمپانیای گۆگڵ لەدوو كاتی جیاوازی ئەمساڵدا دوو مۆبایل دەخاتە بازاڕەوە، كە لەسەرەتادا پكسڵ 5 ئای و دواتر پكسڵ 6 دەبێت، بەهێزترین تایبەتمەندیشیان لە كامێرەكەیاندا دەبێت، بەتایبەت كامێرای پێشەوە كە بۆ سێڵفی بەكاردێت و مێگاپكسڵێكی زۆری دەبێت، هاوكات پرۆگرامی تایبەت بە چارەسەر و چاكردنی وێنەی تێدا دەبێت.

264 جار خوێندراوەتەوە