سەیرترین شێوازەكانی گێڕانی ئاهەنگی سەری ساڵ

KNN : Kurdish News Network
08:49 - 31/12/2020
هەمەڕەنگ

بزانە بۆچی لەشەوی سەری ساڵدا سویسرییەكان ئایس كرێم فڕێدەدەن و میسرییەكان قاپەكانیان دەشكێنن

گێڕانی ئاهەنگی شەوی سەری ساڵ یەكێكە لە نەریتەكانی وڵاتانی جیهان، بەڵام هەر وڵاتە و بەشێوازێكی جیاواز ئەو یادە دەكاتەوە و بەشێكیشیان ڕێگای سەیری ئاهەنگ گرتن دەگرنە بەر.

هەرچەندە ئەمساڵ بەهۆی بڵاوبونەوەی ڤایرۆسی كۆرۆنا،  لە زۆرینەی وڵاتانی جیهانی ئاهەنگی گەورە و كۆبونەوەی جەماوەری ئەنجام نادرێت، بەڵام هاوڵاتیان لە ماڵەكانی خۆیان و بە كۆبونەوەی خێزانی و دروستكردن و ئامادەكردنی خواردن و خواردنەوە و شیرینی جیاواز یادەكە دەكەنەوە.

 

لە هۆڵەندا منداڵان پێڵاوەكانیان لەدەرەوە جێدەهێڵن و كەمێك شەكر و پوشی تێدەكەن، ئەوەش وەك چاوەڕوانییەك بۆ دیارییەكانی سانتاكلۆز، بەڵام لە مەكسیك بە پێچەوانەوە منداڵان لەسەر شەقام پێڵاو دەگرنە یەكتر وەك شێوازێكی ئاهەنگ گێڕانی ساڵی نوێ.

 

خواردنی (12) دەنك ترێ لە شەوی سەری ساڵدا نەریتێكی ئیسپانیەكانە، هەر دەنكێك ترێ ئاماژەیە بۆ یەكێك لەمانگەكانی ساڵ، بەڕای ئەوان ئەوەی هەموو ترێكە تەواو بكات ساڵێكی خۆش بەڕێدەكات بەڵام ئەگەر كەسێك نەتوانێت (12) دەنك ترێكە بخوات، ئەوا لەو ساڵەدا بەختی نابێت.

 

لەتایلەند هاوڵاتیان چەند كیسێكی نایلۆن پڕدەكەن لە ئاو دواتر هەڵی دەدەن بۆ دەموچاوی یەكتر، ئەوەش وەك هێمایەكی خۆی دەربڕین.

 

دانیشتوانی شاری ئەسكەندەریە لە وڵاتی میسر چاوەڕێی تێپەڕبونی یەكەم كاتژمێری ساڵی نوێ دەكەن و لە باڵكۆنی ماڵەكانیانەوە دەست دەكەن بە شكاندنی قاپ و كوپ و پەرداخ و كەلوپەلی دیكەی شوشە، ئەوەشیان لەیۆنانییەكانەوە وەرگرتووە كە لەكاتی دڵخۆشیدا بەو شێوەیە ئاهەنگیان گێڕاوە.

 

فەرەنسییەكان لەو شەوەدا شیرینیەكی تایبەت دەخۆن، بەڵام هاوڵاتیانى سویسرا ئایس كرێم فڕێدەدەنە سەر زەوی و شەقامەكان، بۆ ئەوەی ساڵەكان پڕبێت لە بەخت و ئاشتی و پارە و سامانی زۆر.

 

لەسكۆتلەندا دوو ڕێگا هەیە بۆ ئاهەنگ گێڕان، یەكێكیان داگیرساندنی مەشخەڵی ئاگرە بۆ ترساندن و ڕاونانی ڕۆحی شەڕەنگێزی، ئەم نەریتەش ماوەی زیاتر لە سەدەیەكە بەردەوامە، هەروەها لەو شەوەدا یەكەم كەس كێ پێ بخاتە ماڵەكەیانەوە دیارییەكی پێشكەش دەكەن، بەو هیوایەی بەختی باشی بۆ هێنابێتن، زۆرجاریش دیارییەكە لە خواردنەوە پێكهاتووە.

 

لە وڵاتانی ئەمریكای لاتین شێوازی تایبەت جیاواز هەیە بۆ ئاهەنگ گێڕان، جوتیارانی پیرۆ لەشەوی ساڵی نوێدا چەند وشەیەك ئاڕاستەی یەكتر دەكەن، كێشەكانی ڕابردوویان لەبیردەكەن و دواتر باوەش بەیەكدا دەكەن، بەڵام لە كۆڵۆمبیا و ئیكوادۆر خەڵكی بوكەڵەی پوش و قوماش دەسوتێنن، وەك هێمایەك بۆ كەسە خراپەكانیانی ژیانیان، پێشیانوایە بەوە لە بەختی خراپ رزگاریان دەبێت.

 

445 جار خوێندراوەتەوە