تەندروستى هەرێم لەبارەى خوێندن لە ناو پۆلدا بڕیار دەدات

KNN : Kurdish News Network
02:18 - 26/10/2020
کوردستان

بەهۆى تەشەنەسەندنى کۆرۆنا، هەفتەى داهاتوو ئەنجومەنى وەزارەتى تەندروستى هەرێم کۆدەبێتەوە و هەڵسەنگاندن بۆ بەردەوامیدان بە پرۆسەى خوێندن لەناو ناوەندەکانى خوێندندا دەکات.

د.سامان بەرزنجى وەزیرى تەندروستى حکومەتى هەرێم، داوا لە هاوڵاتیان دەکات پابەندى رێنماییەکانبن بۆ خۆپارێزى لە ڤایرۆسى کۆرۆنا، دەشڵێت: ئەنجومەنی وەزارەتەکەیان رۆژی یەکشەممەی داهاتو کۆدەبێتەوە و جارێکی دیکە هەڵسەنگاندن بۆ بەردەوامی پرۆسەی خوێندن لە قوتابخانە و زانکۆ و پەیمانگاکان دەکات.

وەزیرى تەندروستى هەرێم لە کۆنگرەیەکى رۆژنامەوانیدا راشیگەیاند، سەرەڕاى پابەندبون بە رێنماییەکان، بەڵام داوایانکردوە کە قوتابخانەکان بابەتی هاتوچۆی خوێندکاران و شوێنی نانخواردن و دانیشتنیان رێکبخرێت، بەپێچەوانەوە ئەو ناوەندانەش مەترسی بڵاوبونەوەی پەتاکەیان تێدا دروست دەبێت.

ئەوە لەکاتێکدایە، وەزارەتى پەروەردەى هەرێم بڕیاریدا لە بەروارى (27/9/2020) پرۆسەى خوێندن لە ناو پۆلدا بۆ قۆناغى (12)ى ئامادەیى دەستپێبکات و بە هەمانشێوە بۆ پۆلەکانى یەک و دوى بنەڕەتى لە بەروارى (10/10/2020) دەست پێبکات و خوێندن لەسەرجەم قۆناغەکانى دیکەدا بەشێوەى ئەلکترۆنى بێت.  

14645 جار خوێندراوەتەوە