بەرپرسێکی ئەمریکی کاتی هێرشەکەی تورکیا بۆسەر رۆژئاوا ئاشکرادەکات

09:30 - 09/10/2019
جیهان

بەرپرسێکی ئەمریکی رایگەیاند، باڵیۆزی ئەمریکا لە ئەنقەرە ئاگادارکراوەتەوە کە هێرشەکە لە ماوەی ٢٤ کاتژمێری داهاتوودا دەستپێدەکات.

بەرپرسێکی ئەمریکی بە گۆڤاری فۆرن پۆلیسی ئەمریکای راگەیاندووە، باڵیۆزی ئەمریکا لە ئەنقەرە ئاگادارکراوەتەوە، هێرشی تورکیا بۆسەر باکوری سوریا "رۆژئاوای کوردستان" لە ماوەی ٢٤ کاتژمێری داهاتوودا دەستپێدەکات.

وەکو گۆڤارەکە ئاماژەی پێکردووە، بەرپرسانی کوردیش ئاماژەیان بە هەمان ماوە کردووە.

لەلایەکی دیکەوە، فەخرەدین ئاڵتون، بەرپرسی راگەیاندنی سەرۆکایەتیی کۆماری تورکیا رایگەیاند، هێرشەکە لە ماوەیەکی "نزیکدا" دەستپێدەکات و هێزەکانی سوپای سوریای ئازاد بەشداری دەکەن.

 

ئاماژەی بەوەشکردووە، ئەو ناوچانەی دەکەونە ژێر دەستی تورکیا، هاوشێوەی عەفرین بەڕێوەدەبرێن.

 

هاوکات، ئەمڕۆ چوارشەممە، ٩ی تشرینی یەکەمی ٢٠١٩، هێزەکانی سوریای دیموکرات بەیاننامەیەکی بڵاوکردەوە لە بەیاننامەکەدا داوا لە کۆمەڵگەی نێودەوڵەتی و وڵاتانی هاوپەیمانی دژی داعش دەکات، رێگری لەو هێرشە بکەن کە "دەبێتە هۆی رژانی خوێنی هەزاران هاوڵاتی مەدەنی بێتاوان".

 

دوای ئامادەکارییەکانی تورکیا بۆ هێرشکردنەسەر رۆژئاوای کوردستان، رۆژی دووشەممە، ئەمریکا هێزەکانی لە دوو خاڵی ناوچەی ئارام لە حەسەکەی سەر بە کانتۆنی جەزیرە و تەل ئەبیەز لە رۆژئاوای کوردستان کشاندەوە.

هاوکات هێزەکانی سوریای دیموکرات دوای کشانەوەی هێزەکانی ئەمریکا رایگەیاند، ئەمریکا هێزەکانی خۆی لەسەر سنوری تورکیا و رۆژئاوای کوردستان دەکشێنێتەوە و رێزیان لە پابەندبوونی خۆیان نەگرت و بە دوو دڵییەوە چاودێری بارودۆخی ناوچەکە دەکەن.

هێزەکانی سوریای دیموکرات رایگەیاند، تورکیا ئامادەکاری بۆ هێرشی سەر رۆژهەڵاتی فورات کردووە و لە کاتی هێرشەکاندا بە بێ دوو دڵی پارێزگاریی لە خۆیان دەکەن.

لەلایەکی دیکەوە، کۆشکی سپی رایگەیاند، دۆناڵد ترەمپ رەزامەندی لەسەر ئۆپراسۆنی تورکیا بۆ سەر باکوری سوریا " رۆژئاوای کوردستان" دەربڕیوە و بەمزوانە هێزەکانی تورکیا هێرش دەکەنەسەر ناوچەکە.

10980 جار خوێندراوەتەوە