دوای خنکانی کەسێک لە دوکان لە سنوری ئاغجەلەر تەرمەکەی دۆزرایەوە

12:49 - 14/08/2019
کوردستان

 
دوای سێ هەفتە لە خنكانی كەسێك لە ئاوی زێی بچوك لە دوكان، درەنگانی ئێوارەی دوێنێ، تەرمەكەی لە سنوری ناحیەی ئاغجەلەر دۆزرایەوە.
 
لە ڕاگەیەنراوێكدا, قایمقامیەتی قەزای دوكان دەڵێت پۆلیسی ناحیەی ئاغجەلەر پێی ڕاگەیاندوون، درەنگانی ئێوارەی دوێنێ,  لە ئاوی سنوری ئاغجەلەر تەرمی ئەو مێرمنداڵە دۆزراوەتەوە، كە پێش ماوەیەك لە ئاوی زێی بچوك لە دوكان خنكا .

ئاماژە بەوەش كراوە, ئەو مێرمنداڵە بە ڕەگەز عەرەب بوەو سێ هەفتە پێش ئێستا كەوتوەتە ناو ئاوی زێی بچوك و ئاو لەگەڵ خۆیدا بردویەتی.

 

لە ماوەی ڕابردوودا, چەند جارێك, ئاوی زێی بچوك وشك كرا ، تا بتوانرێت تەرمی ئەو مێرمنداڵە بدۆزنەوە، بەڵام سەرەنجام لە ئاوی سنوری ناحیەی ئاغجەلەر دۆزرایەوە.


دوێنێش, لە ئاوی زێی بچوك لە دوكان،  لەكاتی مەلەكردن گەنجێك خنكا و لە سەرەتای ئەم ساڵەوە ئەوە حەوتەمین ڕووداوی خنكان بوو كە لە دوكان ڕوو بدات.

460 جار خوێندراوەتەوە