هەڵەبجە; كێبڕكێی جوانترین باخچەكانی ماڵان بەڕێوەچوو

02:36 - 02/08/2019
هەمەڕەنگ


60 خێزان بەشدارییان لەكێبڕكێیەكەدا كرد

لە پارێزگای هەڵەبجە،  بەدروشمی جوانیی ژیان و  باشیی تەندروستیمان  پەیوەستە بە سەوزكردنی ژینگەوە، كێبڕكێی جوانترین و باشترین باخچەكانی ماڵان بەڕێوەدەچێت و خەڵاتی ژینگە دۆستیان پێدەبەخشرێت، ئامانجیش لێی گەیاندنی  ئاستی سەوزایی و ژینگەی شارەكەیە بە ستانداردی جیهانی.

جەبار ئەحمەد، لە 70 مەتری حەوشەی ماڵەكەیدا، سەدان جۆر گوڵ و درەختی ڕواندوە، بۆیە یەكێكە لەو 60 ماڵەی خەڵاتی ژینگەدۆستی پێ‌ بەخشرا.

بۆ چوارەمین ساڵە، تۆڕی رێكخراوەكانی هەڵەبجە هەڵسەنگاندن و خەڵاتی باخچەو سەوزایی باشترینەكانی هەڵەبجە دەكات، ئەم خانمانە هەستێكی جیاوازیان هەیە ،دەڵێن، تەمەن پەیوەندیی بە ژینگە پارێزییەوە نییە، بەڵكوو دەبێـت مرۆڤ لە هەموو تەمەنێكدا گرنگی بە ژینگە بیدات.


سەرۆكی تۆڕی ڕێكخراوەكانی هەڵەبجە دەڵێـت، لەو ڕێگەیەوە دەیانەوێت ئاستی سەوزایی و ژینگەی هەڵەبجە بگەیەننە ستانداردی جیهانی، هاوكات بۆ هەڵبژاردنی ئەو مالانە، پێوەر هەبوە ، كەدەبێت باخچەكەیان لە 20 مەتر چوارگۆشە كەمتر نەبێت.


لەلایەن  تۆڕی ڕێكخراوەكانی هەڵەبجەوە، ماوەی چوار ساڵە پڕۆژەی هەڵسەنگاندنی باخچەكان  دەكرێـت، ساڵی پار بۆ باخچەی دامەزراوە حكومییەكان كرا.بۆ ئەمساڵ 60 ماڵ وەك جوانترین باخچە و سەوزایی لە پارێزگاكەدا دیاری كران. ڕێژەی سەوزایی لە پارێزگای هەڵەبجە، سەدا دوازدەی تێپەڕاندوە. ڕێكخراوەكانی هەڵەبجەش دەڵێن، شارەكە زیاتر پێویستی بە سەوزایی دەبێت.

737 جار خوێندراوەتەوە