زیاتر لە بیست رۆژنامەنوس و میدیاكار، دەستلەكاركێشانەوەی بەكۆمەڵیان لە كەناڵی ئێن ئاڕتی، رادەگەیەنن.

لە راگەیەنراوێكدا، زیاتر لە بیست رۆژنامەنووسی كەناڵی ئێن ئاڕتی رایانگەیاند: بەهۆی سووكایەتیكردنی لە ڕادەبەدەری جێگرو بەڕێوەبەری كەناڵی ئێن ئاڕ تی و خاوەنی كەناڵەكە بەرامبەر كارمەندەكان و پیشەی ڕۆژنامەنووسی، بە كۆمەڵ بڕیاریانداوە دەستلەكار بكێشنەوە.

داواش دەكەن، سەندیكای ڕۆژنامەنوسان لەسەر ئەم بابەتە، بێتە دەنگ و ڕێگە نەدات بەو شێوەیە سوكایەتی بە ڕۆژنامەنووسان بكرێت‌و كار بكرێت لە ڕێگەی دەزگاكانی یاسادانانی ئەم وڵاتەوە، یاسایەك بۆ دیاریكردنی ماف و ئەركەكانی ڕۆژنامەنووس دەربكرێت، بەجۆرێك پارێزگاری لە شكۆی ڕۆژنامەنووسان بكات.

ئاماژە بەوەش دەكەن: خاوەن و بەرپرسانی كەناڵەكە، لەڕوی مەعنەوی و مادی و ماف و خزمەتگوزارییەوە، بێڕێزی و زوڵم لە كارمەندان و رۆژنامەنوسانی كەناڵی ئێن ئاڕتی دەكەن.

لە كۆتاییدا، ئەو رۆژنامەنوس‌و میدیاكارانە داوادەكەن، سەرجەم ڕۆژنامەنووسان هاودەنگ بن بۆ هەمواری یاسای كاری ڕۆژنامەنووسی لە هەرێمی كوردستاندا، بە شێوەیەك كە ماف و ئیمتیازاتی ڕۆژنامەنوسانی تێدا پارێزراو بێت.

ده‌قی نامه‌ی ده‌ستله‌كاركێشانه‌وه‌ كارمه‌ندانی ئێن ئاڕ تی
بەناوی خودا..
بۆ بەڕێزان (سەندیکای ڕۆژنامەنوسان، پەرلەمانی کوردستان، دەزگاکانی ڕاگەیاندن، ڕای گشتی)

بابەت: دەستلەکارکێشانەوەی بەکۆمەڵ

ئێمە وەک ژمارەیەک کارمەندی کەناڵی ئێن ئاڕ تی لە ژووری هەواڵ کە لە چەندین بەرپرسیارێتی جیاوازی وەک (جێگری بەرپرسی ژووری هەواڵ و ژمارەیەک سەرنوسەر لە تی ڤی و دیجیتاڵ میدیا و ئێکس وای زێد و چەندین هەواڵ ساز) بەهۆکاری سووکایەتی کردنی لەڕادەبەدەری بەڕێوەبەر و جێگری کەناڵی ئێن ئاڕ تی و خاوەنی کەناڵەکە بەرامبەر کارمەندەکان و پیشەی ڕۆژنامەنووسی، بە دەستەجەمعی بڕیارمانداوە دەستلەکاربکێشینەوە.
وە لێرەوە داواکارین سەندیکای ڕۆژنامەنوسان لەسەر ئەم بابەتە بێتە دەنگ و ڕێگە نەدات بەم شێوەیە سوکایەتی بە ڕۆژنامەنووسان بکرێت، وە کار بکرێت لە ڕێگەی دەزگاکانی یاسادانانی ئەم وڵاتەوە یاسایەک بۆ دیاریکردنی ماف و ئەرکەکانی ڕۆژنامەنووس دەربکرێت کە پارێزگاری لە شکۆی ڕۆژنامەنووسان بکات.

دەمانەوێت ئەوە ڕوونبکەینەوە بەرپرسانی دامەزراوەی میدیایی نالیا و ئێن ئاڕ تی و خاوەنەکەی چۆن سوکایەتی بە ڕۆژنامەنووسان دەکەن:

١. لە ڕووی مەعنەوییەوە: بەداخەوە لەو کەناڵەدا هیچ ڕێزێک بۆ کاری ڕۆژنامەنووسی نییە و ئیستغلالی بارودۆخی خراپی ئابوری کارمەندەکان دەکەن بە هەموو شێوەیەک، سەرباری ئەوەی زۆرترین کاریان پێ دەکرێت بەڵام هیچ دەستخۆشی و ڕێز و شکۆیەک لە لایەن بەرپرسانی ئەو کەناڵەوە بۆ ڕۆژنامەنووسان دانانرێت.

٢. لە ڕووی مادییەوە: بە هیچ شێوەیەک کەناڵی ئێن ئاڕ تی پابەند نەبووە و نابێت بەو گرێبەستەی کە لەگەڵ کارمەندەکانی کردووە، جگە لەوەی ٣٠٪ موچەکانی بڕیون، ساڵانه هیچ بڕە پارەیەک وەک ئەوەی لە گرێبەستەکەدا هاتووە بۆ کارمەندەکان خەرج ناکرێت و سەرباری ئەوەش لە بچووکترین هەڵەدا کارمەندەکان سزای مادی دەدرێن و ئەمەش لە کاتێکدایە ئەو کەناڵە هەمان ڕەخنە لە حکومەت و حزبەکانی دیکە دەگرێت.

٣. لە ڕووی ماف و خزمەتگوزارییەوە: بەداخەوە بەرپرسان و ئیدارەی ئەو کەناڵە تەنانەت ئاوی خواردنەوە بەڕێکوپێکی بۆ کارمەندەکانیان دابین ناکەن و چەندین جار کارمەند لە دەرەوە ئاوی خواردنەوەی بردووە، جگە لە نەبوونی خواردن و شوێنی حەوانەوەی کارمەندەکان، کە بە پێی یاسا بەرکارەکان دەبێ هەبێت و دەیان کەموکورتی تر کە ناکرێت سەرجەمیان لێرەدا باس بکرێت.


لە کۆتاییدا داواکارین لەسەرجەم ڕۆژنامەنووسان کە هاودەنگبن بۆ هەمواری یاسای کاری ڕۆژنامەنووسی لە هەرێمی کوردستاندا بە شێوەیەک کە ماف و ئیمتیازاتی ڕۆژنامەنوسانی تێدا پارێزراو بێت.