چین بە توندی دژایەتیی گەمارۆ تاكلایەنەكانی ئەمریكا دەكات بەرامبەر بە ئێران

07:57 - 19/07/2019
جیهان

چین داوا لە ئەمریكا دەكات وەڵامی نیگەرانییەكانی كۆمەڵگەی نێودەوڵەتی بداتەوە

وتەبێژی وەزارەتی دەرەوەی چین رایگەیاند: وڵاتەكەی بە توندی دژایەتیی تەواوی ئەو سزایانەی ئەمریكا دەكات كە تاكلایەنە بەرامبەر بە ئێران، سەپاندوونی و داواشی لە واشنتۆن كرد، بەزووترین كات لە بڕیارە نادروستەكانی، پاشگەز ببێتەوە.


گەنگ شوانگ، وتەبێژی وەزارەتی دەرەوەی چین، لە كۆنگرەیەكی رۆژنامەوانیدا رایگەیاند: وڵاتەكەی نیگەرانە لە سەپاندنی سزای نوێ بەسەر تاراندا و بە توندی دژایەتیی بڕیارە تاكلایەنەكانی واشنتۆن دەكەن دژ بە ئێران.

لە درێژەی وتەكانیدا، ناوبراو تەئكیدی كردەوە لەوەی، چین گەمارۆكانی ئەمریكا، بە هۆكاری سەرەكیی ئاڵۆزییەكانی رێككەوتنە ئەتۆمییەكەی ئێران دەزانێت و داوا لە واشنتۆن دەكەن كە لەم ڕووەوە، وەڵامی نیگەرانییەكانی كۆمەڵگەی نێودەوڵەتی بداتەوە.

ئەم وتانەی وتەبێژی وەزارەتی دەرەوەی چین لە كاتێكدان، كە رۆژی پێنجشەممە وەزارەتی گەنجینەی ئەمریكا لە بەرامبەر چالاكییەكانی ئەم دواییەی ئێران و پیتاندنی یۆرانیۆم، ژمارەیەك سزای نوێی بەسەر ئەو وڵاتە و چەند لایەنێكی دیكەدا سەپاند، كە لەنێویاندا چوار كۆمپانیای چینیی هەن.

480 جار خوێندراوەتەوە