نەتەوەیەكگرتوەكان: پێویستە ڕوسیا كۆمەڵكوژیی سەر نەخۆشخانەكانی ئیدلیب بوەستێنێت

07:26 - 19/07/2019
جیهان

باڵیۆزی ڕوسیا: تەنها 2 ناوەندی پزیشكی لە ئیدلیب هێرشیان كراوەتە سەر‌و ئەوەش ئێمە نەبووین

 

ڕێكخراوی نەتەوەیەكگرتوەكان داوا لە ڕوسیا دەكات، كۆمەڵكوژییەكانی بۆ سەر ناوەندە پزیشكییەكانی ئیدلیب، بوەستێنێت، باڵیۆزی ڕوسیاش لە نەتەوەیەكگرتوەكان، رەتی دەكاتەوە وڵاتەكەی هیچ ناوەندێكی پزیشكیی كردبێتە ئامانج.

مارك لاوكۆك سەرۆكی ئەنجوومەنی مرۆیی نەتەوە یەكگرتوەكان، لە بەیاننامەیەكدا هێرشی كردە سەر حكومەتی ڕوسیا و ڕایگەیاند: پێویستە، ڕوسیا كۆمەڵكوژییی ئیدلیب رابگرێت.

ئەو دواكارییەش دوای ئەوە دێت، دوێنێ حكومەتی روسیا پرۆژە پێشنیازێكی ئەنجوومەنی مرۆیی نەتەوە یەكگرتوەكانی ڕەت كردەوە بۆ وەستاندنی هێرشەكانی بۆ سەر ئیدلیب.

ئەمڕۆش, باڵیۆزی ڕوسیا لە نەتەوە یەكگرتوەكان، لە وەڵامی داواكارییەكەی لاوكۆكدا ئاماژەی بۆ ئەوە كرد: لە كۆی 11 ناوەندی پزیشكی، 9 ناوەندیان هیچ هێرشێكیان نەكراوەتە سەر‌و وتیشی تەنها دوو ناوەندی پزیشكی بەر هێرشی ئاسمانی كەوتوون، ئەو هێرشانەش ئەوان ئەنجامیان نەداون.

زیاتر لە سێ مانگە سوپای سوریا بە هاوكاریی ڕوسیای هاوپەیمانی، بۆردومانی پارێزگای ئیدلیب و چەند ناوچەیەكی تریان دەست پێ كردوە‌و بەهۆیەوە تا ئێستا زیاتر لە 500 كەس كوژراون و 200 هەزار كەسیش ئاوارە بوون.

286 جار خوێندراوەتەوە