وەزیری دەرەوەی یۆنان: كڕینی ئێس 400 لەلایەن توركیاوە یارمەتیی ناوچەكە نادات

09:14 - 18/07/2019
جیهان

نیكۆس دێندیاس: كڕینی ئێس 400 كاریگەریی لەسەر پەیوەندییەكانی توركیا و یۆنان دەبێت

وەزیری دەرەوەی یۆنان ڕایگەیاند، كڕینی سیستەمی بەرگریی ئێس 400ی روسی لەلایەن توركیاوە كاریگەریی نەرێنیی لەسەر پەیوەندییەكانی ئەنقەرە و تەواوی وڵاتانی ئەوروپا دەبێت و سودێكی ئەوتۆ بە خودی توركیا ناگەیەنێت.


نیكۆس دێندیاس، وەزیری دەرەوەی یۆنان لە چاوپێكەوتنێكی تەلەفزیۆنیدا ئاماژەیكرد بەوەی، كە كڕینی سیستەمی بەرگریی ئێس 400 لەلایەن توركیاوە وەك وڵاتێكی ئەندام لە هاوپەیمانیی ناتۆ كێشەی دروستكردووە و ئەم هەنگاوە بۆ بەهێزكردنی متمانە لە ناوچەكەدا یارمەتیدەرنابێت.

وتیشی: چالاككردنی سیستەمی بەرگریی ئێس 400 كە لەلایەن روسیاوە بەرهەمهاتووە، كێشە بۆ پەیوەندییەكانی توركیا لەگەڵ هەریەك لە یۆنان، یەكێتیی ئەوروپا، هاوپەیمانی ناتۆ و ویلایەتە یەكگرتووەكان و تەنانەت كۆمەڵگەی نێودەوڵەتیش دروستدەكات.

ڕۆژی 12ی ئەم مانگە، یەكەم كاروانی سیستەمی بەرگریی ئێس 400 لەلایەن ڕوسیاوە ڕادەستی توركیا كرا، تاكو ئێستا شەش كاروانی سیستەمەكە گەیەندراوەتە ئەنقەرە, ئەمەش نیگەرانیی راستەوخۆی بەرپرسانی واشنتۆنی بەدوای خۆیدا هێناوە لە نوێترین كاردانەوەدا ئیدارەكەی ترەمپ ڕایگەیاند كە توركیا لە پرۆگرامی فڕۆكەی ئێف 35 بێبەشدەكەن.

261 جار خوێندراوەتەوە