بەپەلە

جەبل تاریق: كەشتییە نەوتگوێزەرەوەكەی ئێران سزاكانی یەكێتی ئەوروپای پێشێل كردووە

07:28 - 12/07/2019
جیهان

جەواد زەریف: بەریتانیا هیچ بیانوویەكی نیە بۆ دەستبەسەراگرتنی كەشتی نەوتی وڵاتەكەمان
ئێران داوا لە بەریتانیا دەكات كۆتایی بە دەستبەسەراگرتنی كەشتییەكەی بهێنێت 
بەریتانیا ئاستی ئەمنییەتی كەشتییەكانی لە كەنداو گەیاندوەتە بەرزترین ئاست 
بەریتانیا بەو پەڕی هەستیارییەوە لە ئاوەكانی كەنداودا مامەڵە دەكات


سەرۆك وەزیرانی ناوچەی جەبل تارق رایدەگەیەنێت: بەهۆی پێشێلكردنی سزاكانی یەكێتیی ئەوروپا لە دژی سوریا، دەستیان بەسەر كەشتییە نەوتگوێزەرەوەكەی ئێراندا گرتوە. وەزیری دەرەوەی ئێرانیش ئاماژە بەوەدەكات: سزاكانی ئەوروپا لە دژی سوریا، هیچ پەیوەندییەكیان بە كەشتی نەوتی وڵاتەكەیەوە نییە.

بەرپرسێكی هێزی دەریایی بەریتانیاش ئاشكرای دەكات، وڵاتەكەی ئاستی ئەمنیەتی كەشتییەكانی لە ئاوەكانی كەنداو، گەیاندوەتە بەرزترین ئاست و بەوپەڕی هەستیارییەوە چاودێریی هاتوچۆی كەشتییە نەوتهەڵگرەكانی بەریتانیا و جموجۆڵی ئێران دەكەن.

ناكۆكییەكانی نێوان لەندەن و تاران لەبارەی دەستبەسەراگرتنی كەشتییەكی نەوتی ئێران لەلایەن بەریتانیاوە پەرە دەسێنێت و هەردوولا یەكتری تۆمەتبار دەكەن بەوەی یاسا نێودەوڵەتییەكانیان پێشێل كردوە. 

فابیان بیكاردۆ، سەرۆك وەزیرانی ناوچەی جەبەل تارق، سەر بە بەریتانیا لە میانی پێشكەشكردنی وتەیەك لەپەرلەمانی وڵاتەكەی رایگەیاند: بەهۆی ئەوەی كەشتییە نەوتگوێزەرەوەكەی ئێران، پێشێلی سزاكانی یەكێتیی ئەوروپای كردوە لەدژی حكومەتەكەی بەشار ئەسەد و نەوتی بۆ سوریا دەگواستەوە، بڕیاریاندا دەستی بەسەردا بگرن.

لەبەرامبەدا، محەمەد جەواد زەریف، وەزیری دەرەوەی ئێران رایگەیاند، حكومەتی بەریتانیا، هیچ بیانویەكی یاسایی و لۆژیكی نییە، كە دەست بەسەر كەشتی نەوتی وڵاتەكەیدا بگرێت، ئەو كارە پێشێڵكردنی یاسای نێودەوڵەتییە. وتیشی: سزای یەكێتی ئەوروپا بەسەر سوریا، هیچ پەیوەندییەكی بەفرۆشتنی نەوتی ئێران  بە سوریاوە نییە.

هاوكات، عەباس موسەوی، وتەبێژی وەزارەتی درەوەی ئێران رایگەیاند: لەدوای دەستبەسەراگرتنی كەشتییە نەوت گوێزەكەیان لەناوچەی جەبەل تارق، چوار جار بانگهێشتی باڵیۆزی بەریتانیایان لە تاران كردوە. موسەوی داواشی كرد، بەریتانیا رێگە بەكەشتی نەوت گوێزەرەوەی گریس وەن بدات كە ناوچەی جەبەل تارق جێبهێڵت.
لەبەشێكی دیكەی قسەكانیدا، وتەبێژی وەزارەتی دەرەوەی ئێران رایگەیاند: وڵاتانی ئەوروپا، سزایان بەسەر كەرتی نەوتی ئێران نەسەپاندوە، بۆیە ناتوانن دەستبەسەركەشتییە نەوت گوێزەرەوەكانیشیاندا بگرن.

لەلایەكی دیكەوە، فەرماندەیەكی باڵای هێزە دەریاییەكانی بەریتانیا، رایگەیاند: راستەوخۆ دوای هەڕەشەكانی بەرپرسانی ئێران، ئاستی ئەمنییەتی كەشتییەكانیان لە گەرووی هورموز و ئاوەكانی كەنداو بە گشتی گەیاندوەتە بەرزترین ئاست.

رۆژێك دوای بەرزكردنەوەی ئاستی ئەمنییەتی كەشتییەكانیان، وەزارەتی بەرگریی بەریتانیا ڕایگەیاند: چەند بەلەمێكی سەر بە سوپای پاسدارانی ئێران هەوڵیانداوە لە گەرووی هورموز، رێگری بكەن و لە كەشتییەكی نەوتهەڵگری بەریتانیا نزیكبوونەتەوە، بەڵام دوای ئەوەی كەشتییەكی جەنگیی سەر بە سوپای بەریتانیا ئاڕاستەی چەكەكانی بەرەوڕووی بەلەمە ئێرانییەكان جێگیركردوە، بەلەمەكان كشاونەتەوە.

هێزی دەریایی سەر بەسوپای پاسداران لەبەیاننامەیەكدا، وێڕای جەختكردنەوە لەوەی كە توانای ئەنجامدانی ئەو كارەیان هەیە، رەتیان كردەوە لەئاوەكانی كەنداودا ڕووبەرووی هیچ كەشتیەكی بیانی بەگشتی و كەشتی بەریتانی بەتایبەتی بوبێتنەوە.

361 جار خوێندراوەتەوە