گەروی هورمز؛ هەوڵێكی ئێران بۆ دەست بەسەراگرتنی نەوت گوێزەرەوەی بەریتانیا شكستی هێنا

09:30 - 11/07/2019
جیهان

حكومەتی بەریتانیا داوا لەئێران دەكات دووربكەوێتەوە لەئاڵۆزتركردنی دۆخی ناوچەكە

بەرپرسانی ئەمریكا هەوڵێكی ئێران بۆ دەستبەسەراگرتنی كەشتیەكی نەوت گوێزەرەوەی بەریتانی ئاشكرا دەكەن و حكومەتی بەریتانیاش هەواڵەكە پشت راست دەكاتەوە.


ئاژانسەكانی هەواڵ لەزاری بەرپرسێكی وەزارەتی بەرگری ئەمریكاوە بڵاویان كردەوە، رۆژی چوارشەممە چەند بەلەمێكی ئێرانی لەگەروی هورمز لەكەشتیەكی نەوت گوێزەرەوەی بەریتانی نزیك بونەتەوەو هەوڵیانداوە  دەستی بەسەردابگرن، بەڵام  هێزی دەریایی بەریتانیا شكستی بەو هەولە هێناوە و بەلەمە ئێرانیەكانی ناچار بەپاشەكشە كردوە..

لای خۆشیەوە حكومەتی بەریتانینا هەواڵەكەی پشت راست كردەوە لەبەیاننامەیەكدا ئاشكرای كرد 3 بەلەمی ئێرانی هەوڵی دەستبەسەراگرتنی كەشتەیەكی نەوت هەڵگری بەریتانی داوە.

حكومەتی بەریتانیا نیگەرانی لەو هەوڵەی ئێران دەربڕیوە و داواشی لەحكومەتی تاران كردوە دووربكەوێتەوە لەئاڵۆزتركردنی دۆخی ناوچەكە .

رۆژی سێ‌ شەممەی رابردوو محەمەد باقری سەرۆكی ئەركانی هێزە چەكدارەكانی ئێران رایگەیاند، دەست بەسەراگرتنی كەشتیە نەوت گوێزەرەوەكەی وڵاتەكەی لەلایەن هێزی دەریایی بەریتانیاوە بێ‌ وەڵام نابێت.

1507 جار خوێندراوەتەوە