بەپەلە

یونسكۆ شاری بابلی خستە لیستی شوێنەوارە جیهانییەكانەوە

10:30 - 06/07/2019
عێراق

عێراق؛ 59 ملیار دینار بۆ نۆژەنكردنەوەی بابل تەرخان كراوە

ڕێكخراوی یونسكۆ, شاری مێژوویی و شوێنەواری بابلی باشووری عێراقی خستە لیستی شوێنەوارە جیهانییەكانەوە‌و داواشی كرد، تا مانگی شوباتی ساڵی داهاتوو، ئەو شوێنەوارە مێژووییە لە پاشماوەكان، پاك بكرێتەوە.


پەرلەمانتارێكی رەوتی حیكمە دەڵێت: حكومەتی عیراق 59 ملیار دیناری بە مەبەستی نۆژەنكردنەوەی شوێنەواری دێرینی بابل، تەرخان كردوە.

رۆژی هەینی، لیژنەی شوێنەوارە جیهانیەكان لەشاری باكۆی پایتەختی ئازەربایجان، دوای دەنگدان، شوێنەواری مێژوویی و دێرینی بابل-ی لە عیراق، خستە لیستی شوێنەوارە جیهانیەكانەوە.

ئەو بڕیارەی یونسكۆ، خۆشحاڵیی هاوڵاتیانی ناوچە جیاكانی عیراقی بەدوای خۆیدا هێناو خۆشحاڵییان پیشاندا بەوەی، شوێنەواری مێژوویی بابل خراوەتە ریزبەندیی شوێنەوارە مێژووییەكانی جیهانەوە.

لیژنەی شوێنەوارە جیهانیەكان سەر بەڕێكخراوی یونسكۆ, ئەو مەرجەی بۆ حكومەتی عیراق داناوە كەتا مانگی شوباتی ساڵی داهاتوو, ئەو شارە شوێنەوارییە لە پاشماوە پاك بكرێتەوە بەبێ‌ ئەوەی ئاماژە بە پاشماوەكان بكات.

سالم توفەیلی پەرلەمانتاری رەوتی حیكمە رایگەیاندووە, وەزارەتی رۆشنبیری عیراق, بڕی 59 ملیار دیناری بەمەبەستی نۆژەنكردنەوەی شوێنەوارە مێژووییەكانی بابل تەرخانكردووە.   

شاری بابل-دەكەوێتە باشوری عیراقەوەو 85 كیلۆمەتر لەشاری بەغداوە دوورە.

مێژووی بابل بۆ چوار هەزارو 300 ساڵ پێش ئێستا دەگەڕێتەوە.
حامورابی پاشای شەشەمی ئیمپراتۆریەتی بابلی كە لەنێوان ساڵانی 1792 تا 1750 حوكمڕانیی كردوە. لەناوەندی شاری بابلەوە حوكمڕانیی ناوچەیەكی بەرفراوانی كردووە، خاوەنی قەڵەمڕەویی و دەسەڵاتێكی بەهێز بووە لەناوچەكەدا.  

نەبوخوزنەسریش, یەكێكی دیكەیە لە پاشا بەناوبانگەكانی ئیمپراتۆریەتی بابلی كە حوكمڕانیی بابل-ی كردوەو لەگەڵ حامورابیدا ناویان وەك دوو دەسەڵاتداری بابلی دێت كە رۆڵیان هەبوە لە پێشخستنی شارستانیەتی بابل بەتایبەتی لەرووی بیناسازییەوە.

هەندێك سەرچاوەش باس لەوە دەكەن، ئەسكەندەری مەكدۆنی كە سەرۆكایەتی سوپاكەی كرد و بەشێكی زۆری جیهانی داگیر كرد، ساڵی 332ی پێش زایین لەشاری بابل مردوە.

379 جار خوێندراوەتەوە