ترەمپ پەیامێكی توند ئاڕاستەی عەلی خامنەیی دەكات

09:34 - 24/06/2019
جیهان

ترەمپ بۆ خامنەیی: ئەگەر شەڕ رووبدات ئەوا وێرانكارییەك دەبێت كە هەرگیز پێشتر نەتبینیوە
ترەمپ: بۆ دەستپێكردنەوە بە گفتوگۆ هیچ مەرجێكی پێشوەختەم نییە


دۆناڵد ترەمپ، پەیامێكی توندی ئاڕاستەی عەلی خامنەیی كرد و رایگەیاند: ئەو بەدوای شەڕدا ناگەڕێت، بەڵام ئەگەر رووبدات، ئەوا وێرانكارییەكی وا دەبێت، كە پێشتر هەرگیز بەرپرسانی باڵای ئێران نەیانبینیوە.

دۆناڵد ترەمپ، سەرۆكی ویلایەتە یەكگرتووەكانی ئەمریكا، لە نوێترین چاوپێكەوتنی تەلەفزیۆنیی خۆیدا لە كەناڵی ئێن بی سی وڵاتەكەی رایگەیاند: دەیەوێت پەیامێك ئاڕاستەی عەلی خامنەیی ڕابەری باڵای ئێران بكات و ئاماژە بەوە كرد كە ئەو بە شوێن جەنگدا ناگەڕێت، بەڵام ئەگەر شەڕ ڕووبدات، ئەوا وێرانكارییەكەی بەجۆرێك دەبێت، كە هەرگیز پێشتر بەرپرسانی ئێران نەیانبینیوە.

لە درێژەی وتەكانیدا، ترەمپ ئاماژەی بەوەش كرد كە ئەو نایەوێت وێرانكارییەكی لەوشێوەیە رووبدات، بەڵام ناشكرێت تاران ببێتە خاوەنی چەكی ئەتۆمی.

وتیشی، ئەگەر ئێران بیەوێت لەبارەی پرۆگرامە ئەتۆمیەكەیەوە، گفتوگۆ بكات ئەوا باشە، ئەگەریش نا، ئەوا لە سێ ساڵی داهاتوودا ئابورییەكی زۆر خراپی دەبێت. 

ترەمپ لە بارەی بوونی مەرجی پێشوەختەوە بۆ دانوستان لەگەڵ ئێران ڕایگەیاند، كە ئەو هیچ پێش مەرجێكی بۆ دانوستان لەگەڵ تاران نییە.

5990 جار خوێندراوەتەوە