فراكسیۆنی گۆڕان بە دواداچوون بۆ كێشەی ئاوی سلێمانی دەكات

06:35 - 19/06/2019
کوردستان

فراكسیۆنی گۆڕان: هەوڵدەدەین لە كابینەی نوێدا كێشەی ئاوی سلێمانی بەشێوەیەكی ریشەیی چارەسەر بكەین


فراكسیۆنی گۆِران بە دواداچون بۆ كێشەی ئاوی سلیمانی دەكات و رایدەگەیەنێت: هەوڵدەدەن لە كابینەی نوێی حكومەتدا، كێشەی ئاوی سلێمانی بەشێوەیەكی ریشەیی چارەسەر بكرێت.


لە راگەیەندراوێكدا فراكسیۆنی گۆڕان لە پەرلەمانی كوردستان رایگەیاند: پاش بە دواداچونیان بۆ كێشەی ئاوی سلێمانی، لە ئێستادا بەشێك لە گەڕەكەكان گرفتی كەمی و نەبوونی ئاویان هەیە و بە پێی بەدواداچونەكانیان، لە سەدا 20 ی سلێمانی، تۆڕی ئاوی نییەو بەشێكی بە تانكەر ئاوی بۆ دەچێت و بەشێكیشی بە تانكەریش بۆی ناچێت‌و هەندێك شوێن ئاوی پیسی بۆ دەچێت لەوانە گەڕەكی باخان.

ئاماژەی بەوەش كردوە: دوای گفتوگۆكردن لەگەڵ سەربەست عوسمان قادر، بەڕێوەبەری ئاوی سلێمانی‌و دیاریكردنی گرفتەكانی ئاو لە سلێمانی، نەورۆز مەولود وەزیری شارەوانی بەڵێنی داوە، ئەوەی پێویست بێت لە زوترین كاتدا بۆ چارەسەری گرفتی ئاوی سلێمانی، دەیكەن و لە سبەینێوە كار بۆ خەرجكردنی ئەو پارانە دەكەن كە پێویستە.

هاوكات، فراكسیۆنی گۆڕان ئاماژەی بە جیاوازی لە نێوان هەولێر و سلێمانی كردوە و رایگەیاندوە: "پشتگوێخستنی پرۆژەكانی ئاو لە سلێمانی رونە، پار ساڵ هەولێر یەك ملیار دیناری بۆ چاككردنەوە بۆ تەرخان كرا، بەڵام هیچ بڕێك بۆ سلێمانی تەرخان نەكرا".

فراكسیۆنی گۆڕان جەختیشی كردوەتەوە، جگە لەم چارەسەرە كاتییە، لە كابینەی نوێی حكومەت هەوڵدەدەن بەجێبەجێكردنی چەند پرۆژەیەك، كێشەی ئاوی سلێمانی بەشێوەیەكی ریشەیی چارەسەر بكرێت.

382 جار خوێندراوەتەوە