بەپەلە

ژاپۆن؛ بومەلەرزەیەك بە گوڕی 6،7 پلەی ڕێختەر باكووری خۆرهەڵاتی هەژاند

06:28 - 19/06/2019
جیهان

ژاپۆن؛ لە ئاكامی بومەلەرزەیەك لە باكووری خۆرهەڵات 21 كەس بریندار بوون

بومەلەرزەیەك بە گوڕی 6 پۆینت 7 پلەی ڕێختەر، باكووری خۆرهەڵاتی ژاپۆنی هەژاند، بەوهۆیەشەوە زەویی چەند ناوچەیەك ڕۆچوە و 21 كەسیش بریندار بون.


كەناڵی (تی بی ئێس)ی ژاپۆنی ڕایگەیاند، ئێوارەی دوێنێ سێشەممە، بوومەلەرزەیەكی بەهێز بە گوڕی 6 پۆینت 7 پلەی ڕێختەر شاری مۆراكامی و دەوروبەری لە پارێزگای نیجاتای لە باكووری خۆرهەڵاتی ژاپۆن، هەژاندوە و بەهۆیەوە 21 كەس بریندار بوون.

كەناڵە ژاپۆنییەكە ئەو دیمەنانەی بوومەلەزەكەی پەخش كرد، كە بە هۆیەوە زەویی چەند ناوچەیەك ڕۆچووە و زیانیش بە چەندین خانوویەك گەیشتوە، ئاماژەی بۆ ئەوەش كرد، لە ئاكامی بوومەلەزەكەوە ئاستەنگی هاتوچۆی ئۆتۆمبێل بۆ هەندێ لە ڕێگاوبانەكان دروست بووە، تیمەكانیشیان وێڕای بە هاناوەچوونی هاوڵاتییان و چاككردنەوەی شوێنە زیانپێگەیشتوەكان، توانیویانە پاش ماوەیەكی كورت تەزووی كارەبا بۆ هەزاران ماڵ بگەڕێننەوە كە بەهۆی ئەو بومەلەرزەیەوە بێ‌ كارەبا بون. 

4543 جار خوێندراوەتەوە