مه‌سرور بارزانی: سوپاسى هەڵوێستى جوامێرانەى گۆڕان دەکەین

05:01 - 17/06/2019
کوردستان

مەسرور بارزانى، راسپێردراو بۆ پێکهێنانى کابینەى نوێى حکومەتى هەرێم ستایشى هەڵوێستەکانى بزوتنەوەى گۆڕان دەکات و دەڵێت: "ئێستا چاوەڕوانى ئەوەیان لێدەکەین بتوانین پێکەوە حکومەتێکى بەهێز پێکبهێنین".

دواى کۆتایى هاتنى کۆبوونەوەى شاندى بزوتنەوەى گۆڕان و پارتى دیموکراتى کوردستان کە دواى نیوەڕۆى ئەمڕۆ دوو شەممە 17-6-2019 لە مەکۆى سەرەکى گۆڕان لە سلێمانى بەڕێوەچوو، مەسرور بارزانى، راسپێردراو بۆ پێکهێنانى کابینەى نوێی حکومەت به‌ KNNی راگه‌یاند: "گفتوگۆمان کرد لەسەر پێکهێنانى حکومەت و داواشمان کرد سیڤى کاندیدەکانیان بۆ وەزارەتەکان پێشکەش بکەن".

سوپاسی گۆڕانی كردوو وتی: "سوپاسى هەڵوێستى جوامێرانەى گۆڕان دەکەین، کە پابەندى ئەو رێککەوتنانەبوون، کە لەگەڵ ئێمە واژۆیان کردووە، ئێستاش چاوەڕوانى ئەوەیان لێدەکەین، کە پێکەوە حکومەتێکى بەهێز پێکبهێنین و خەڵک لە چاوەڕوانیدا نەمێنێتەوە".

ئاماژه‌ی به‌وه‌شكرد، كه‌ هه‌وڵ ده‌ده‌ن پێش پشووى پەرلەمان کابینەى نوێ رابگەیەنن و ئەوەش دەکەوێتە سەر لایەنەکانى دیکەش، کە سیڤى کاندیدەکانیان بنێرین، ده‌شڵێت: دڵنیام برادەرانى گۆڕان پێش ئەو وادەیە سیڤى کاندیدانى خۆیان ئامادە دەکەن".

لاى خۆیەوە، جەلال جەوهەر ئەندامى خانەى راپەڕاندنى بزوتنەوەى گۆڕان و سەرۆکى وەفدى دانوستانکارى گۆڕان لەبارەى ناوه‌ڕۆكی کۆبوونەوەکەوە رایگەیاند: رێککەوتنمان هەیە لەگەڵ پارتى دیموکراتى کوردستان و پابەندین بەو رێککەوتنە، ئەمڕۆش بەڵێنماندا، کە تا بۆمان بکرێت لە کاتى دیاریکراوى خۆیدا کاندیدەکانمان پێشکەش بکەین".

4069 جار خوێندراوەتەوە