بەپەلە

رانیە؛ گۆمی گۆمەگای ناحیەی چوارقوڕنە بوەتە مۆتەكەی هاوڵاتیان

09:09 - 15/06/2019
کوردستان

چوارقوڕنە؛ تا ئێستا 14 كەس لە ناو گۆمەكەدا خنكاون

گۆمی گۆمەگا, لە گوندی قەمتەرانی ناحیەی چوارقوڕنە, بوەتە مۆتەكەی هاوڵاتیان و تا ئێستا 14 كەس لەو گۆمەدا خنكاون, كە دواهەمین قوربانی , شوانێكی تەمەن 17 ساڵی دانیشتوی ناحیەی بالیسان بوو.


خەڵكی گوندی قەمتەرانیش تاشەبەردی گەورە و بوونی ئەشكەوتی زۆرو ئاوە ساردەكەی گۆمەگاو نەبونی دیوارێك بە چواردەوری گۆمەكەدا, بەهۆكار دەزانن بۆ  زۆری حاڵەتەكانی خنكان .

ئەمە دیمەنی دەرهێنانەوەی تەرمی گەنجێكی تەمەن 17 ساڵە لە گۆمەگای روباری قەمتەرانی سەر بەناحیەی چوارقورنە،گەنجەكە دانیشتووی ناحیەی بالیسان بوو لە گوندەكەدا شوان بووە، ویستویەتی لەگەرمای نیوەڕۆدا مەلە بكات وخۆی فێنك بكاتەوە، بەڵام ئێرە بووە دوا ویستگەی ژیانی.

بەلای هاوڵاتیانی گوندەكەوە  گۆمەگا  بووەتە مۆتەكە، بەجۆرێك تا ئێستا 14 كەسی تێدا خنكاوە، كە 8 یان دانیشتووی گوندەكە بوون.

جەوهەر رەسوڵ یەكێكە لەدانیشتوانی گوندەكە كە چوار كەس لەئەندامانی بنەماڵەكەی لەم كۆمەدا خنكاوون.

خەڵكی گوندی قەمتەران، تاشەبەردی گەورە و بوونی ئەشكەوتی زۆرو ئاوە ساردەكەی گۆمەگا بەهۆكار دەزانن بۆ  زۆری حاڵەتەكانی خنكان.

ساڵی رابردوو 8 كەس لە چەم و رووبارەكانی دەڤەری راپەڕین خنكاون،  وتەبێژی بەڕێوەبەرایەتی بەرگری شارستانی راپەرین داوا لەهاوڵاتیان دەكات  لەو شوێنانە مەلە بكەن كە تیمی مەلەوانیی لێیە .

لەگەڵ هاتنی وەرزی هاوین و بەرزبوونەوەی پلەكانی گەرما، هاوڵاتیان لەناوچە جیاوازەكانەوە بەمەبەستی مەلەكردن و بەسەربردنی كاتێكی خۆش روو لەگۆمەگا دەكەن، هاوڵاتیانی گوندەكەش داوادەكەن چوار دەوری گۆمەكە دیوار بكرێت، یان لەوەرزی هاویناندا  تیمی مەلەوانی  چاودێریی بكات.

3487 جار خوێندراوەتەوە