بەپەلە

ads top

شینزۆ ئابی دەتوانێت بەستەڵەكی ناكۆكییەكانی نێوان واشنتۆن و تاران بتوێنێتەوە؟

08:08 - 12/06/2019
جیهان

پسپۆڕان: پەیوەندییەكانی واشنتۆن و تاران لە خاڵی سفر نزیك بوەتەوە

مێژوی پەیوەندیەكانی تاران و تۆكیۆ، بۆ نزیكەی 100 ساڵ لەمەوبەر دەگەڕێتەوە، ئەمریكا ژاپۆنی وەك نێوەندگیریی لە نێوان ڕكابەرە سەرەكییەكەی خۆرهەڵاتی ناوەڕاست قبوڵە، بەڵام ئایا سەردانەكەی ئابی بۆ تاران، دەتوانێت بەستەڵەكی ناكۆكیەكانی نێوان واشنتۆن و تاران بتوێنێتەوە، ئایا سەردانەكەی ئابی تەنیا ئامانج لێی نێوەندیگرییە یان ئەمەش گەمەیەكی تری سیاسیەكانە، سەرۆك وەزیرانی ژاپۆنیش ئامانجی تایبەتی خۆی لەم سەردانەیدا بۆ تاران هەیە.


مێژوی پەیوەندییەكانی تاران و تۆكیۆ بۆ نزیكەی 100 ساڵ لەمەوبەر دەگەڕێتەوە، لەسەردانەكەی دۆناڵد ترەمپ بۆ ژاپۆن سەرۆكی ئەمریكا گڵۆپی سەوزی بۆ شینزۆ ئابێ هەڵكرد كە ڕۆڵی نێوەندگیریی لە نێوان تاران و واشنتۆن بگێڕێت.

شینزۆ ئابی، سەرۆك وەزیرانی ژاپۆن، بەسەردانێكی دوو رۆژە لە تارانە..ئابی پێش ئەوەی لە فرۆكەخانە بەرەو تاران بەڕێ‌ بكەوێت، وتی، بۆ ئاڵوگۆڕی بیرورا لەبارەی ئاڵۆزییەكانی ناوچەكە سەردانی ئێران دەكات.

لەوكاتەوەی شۆرشی ئیسلامی ئێران رویداوە لە ساڵی 1979 وە ئەمە یەكەم جارە سەرۆك وەزیرانێكی ژاپۆن سەردانی ئێران بكات.

 ئابێ ئەگەرچی لەلایەن ترەمپەوە لەنێوەندیگیریی سەرپشككراوە بەڵام گومانی گەورە لە سەردانەكەی ئابێ ئەوەیە كە ڕەنگە دۆستایەتی 90 ساڵەی ژاپۆن و ئێران نەتوانێت ڕۆڵی خۆی بەتەواوەتی بگێڕیت.

چاودێرانی سیاسی پێیانوایە دیوێكی تری سەردانەكەی ئابێ بۆ تاران ئەنجامدانی مانۆڕی سیاسییە چونكە ئابێ هەڵبژاردنی گەورەی لە پێشەو دەیەوێت لەڕێگەی ئەم سەردانەیەوە خۆی وەك پیاوێكی دەوڵەتمەدار لەسەر ئاستی جیهان نمایش بكات و بەوەش هەڵبژاردنی داهاتوی خۆی مسۆگەر بكات.

ئەم سەردانەی سەرۆك وەزیرانی ژاپۆن بۆ تاران لەكاتێكدایە كە ژاپۆن ئەندامی ڕێككەوتنە ئەتۆمیەكە نییە بەڵام ژاپۆن یەكێكە لەكڕیارە سەرەكیەكانی نەوتی ئێران كە ئێستا بەهۆی سزاكانی ئەمریكاوە كرینی نەوتی لە ئێران راگرتوە.

خاڵی گرنگ لەم سەردانەدا ئەوەیە كە ئایا ئابێ دەتوانێت سەربەخۆیی و بێلایەنی خۆی لەم نێوندگیرییە بپارێزێت لەم بارەیەوە پڕۆفیسۆر جیف كینگ ستۆن بەڕێوبەری بەشی توێژینەوە لەزانكۆی تیمبل لە تۆكیۆ دەڵێت سزاكانی ئەمریكا لەسەر ئێران وادەكات نرخی نەوت بەرزبكاتەوەو بەمەش زیان بەئابوری ژاپۆن دەگەیێنێت.

 هاوكات پڕۆفیسۆر ڕۆبەرت دوجاریك لە پەیمانگەی توێژینەوەی سەردەمیانە لە تۆكیۆ  پێیوایە پەیوەندیەكانی نێوان واشنتۆن و تاران لەخاڵی سفر نزیك بوەتەوە، لەپاڵ ئەم بۆچونەشدا ڕایەك هەیە كە پێیوایە ڕەنگە ئابێ بتوانێت دانوستانی ڕاستوخۆ لەنێوان ئێران و ئەمریكا ڕێكبخات.

380 جار خوێندراوەتەوە