سعودیە: هێرش كرایە سەر دوو بۆریی گواستنەوەی نەوتی سەر بە كۆمپانیای ئارامكۆ

04:50 - 14/05/2019
ئابوری

وەزیری وزەی سعودیە: بە فڕۆكەی بێفڕۆكەوانی بۆمبڕێژكراو دامەزراوە نەوتییەكان كراونەتە ئامانج
حوسییەكانی یەمەن بەرپرسیارێتیی خۆیان لە هێرش بۆ دامەزراوە نەوتییەكانی سعودیە ڕاگەیاند
میدیاكان: دوای هێرشی حوسییەكان بۆ سەر دامەزراوەی نەوتی سعودیە نرخی نەوت بەرز بوەوە


هێرش دەكرێتە سەر دوو دامەزراوەی نەوتی سعودیە، وەزیری وزەی ئەو وڵاتە دەڵێت، هێرشەكە بە فڕۆكەی بێفڕۆكەوانی بۆمبڕێژكراو ئەنجام دراوە، حوسیەكانی یەمەنیش بەرپرسیارێتیی خۆیان لە ئەنجامدانی ڕادەگەیەنن. دوای هێرشەكە نرخی نەوت بەرز بوەوە.


خالید بن عەبدولعەزیز فالح وەزیری وزە و پیشەسازی و سامانی كانزایی سعودیە ڕایگەیاند، لە كاتژمێر 6 بۆ 6 و 30 خوله‌كی ئەم بەیانییە دوو وێستگەی بۆریی نەوتی خۆرهەڵات-خۆرئاوا كە نەوتی سعودیە لە كێڵگەی نەوتی ناوچەی خۆرهەڵاتەوە دەگوازنەوە بۆ بەندەری بەری خۆرئاوا بەفڕۆكەی بۆمبڕێژكراوی بێفڕۆكەوان هێرشیان كراوەتەسەر. ڕوونیشی كردەوە، ئەو دوو وێستگەیە سەر بە كۆمپانیای ئارامكۆ-ن لە هەردوو شاری دوادمی و عەفیفی نزیك ڕەیازن .

ئاماژەی بۆ ئەوەش كردوە، بەهۆی  هێرشەكەوە ئاگر لەو دامەزراوەیە كەوتوەتەوە  و زیانی مادیی پێ گەیاندوە، بەڵام پاش ماوەیەكی كەم توانراوە ئاگرەكە كۆنترۆڵ بكرێت.

لەو بارەیەوە حوسییەكان یەمەن، لە كەناڵی فەڕمیی خۆیانەوە بڵاویان كردوە، بە فڕۆكەی بێ فڕۆكەوان هێرشیان كردوەتەسەر دامەزراوە نەوتییەكانی سعودیە، بەڵام ئاماژەیان بۆ ئامانجەكان نەكردوە.

میدیاكانی جیهانیش بڵاویان كردەوە: دوای هێرشی حوسییەكان بۆ سەر دامەزراوەی نەوتی سعودیە نرخی نەوت بە ڕێژەی 1 پۆینت 4 بەرز بوە.

416 جار خوێندراوەتەوە