هەولێر؛ هاوڵاتییان داوا دەكەن چاودێریی نرخی بازاڕ بكرێت و نرخ بەرز نەكرێتەوە

07:44 - 11/05/2019
کوردستان

هاوڵاتییانی هەولێر: دەبێ سزای ئەو كەسانە بدرێت كە نرخیان بەرز كردوەتەوە

لەگەڵ هاتنی مانگی رەمەزان, لە چەندین شوێنی هەولێر نرخی كاڵاو شتومەك بەرزبونەوەی بەخۆیەوە بینیوە.


بەشێك لە هاوڵاتیانی هەولێریش داوا دەكەن, لایەنی پەیوەندار چاودێری نرخی بازاڕ بكات و سزای ئەو كەسانەش بدرێت كە لە مانگی پیرۆزی رەمەزاندا نرخیان بەرزكردوەتەوە.

ساڵانە لەگەڵ هاتنی مانگی رەمەزان نرخی شمەك و كاڵاكان لە بازاڕەكانی هەرێمی كوردستان بەرزدەبێتەوە، بەوتەی ژمارەیەك لە هاوڵاتیانی شاری هەولێر ‌وەمساڵیش نرخەكان بەرزبونەتەوە، داواش لە دوكاندار و بازرگانەكان دەكەن بەویژدانەوە شمەك و كاڵاكانیان بفرۆشن، داواش لە بەرپرسانی حكومی شارەكە دەكەن لێپرسینەوە لەو كەسانە بكەن كە پایەندی رێنماییەكان نابن.

قائمقامیەتی قەزای ناوەندی شاری هەولێر جگە لەم لیژنانەی هەیەتی بۆ چاودێریكردنی بازاڕ بۆ مانگی رەمەزان چەند لیژنەیەكی تایبەتیان دروست كردووە، قائیمقامی ئەو شارەش رایدەگەیەنێت چەند شوێنێكیان سزاداوە كە سەرپێچیان كردووە لەرووی نرخەوە.

ئەگەرچی مانگی رەمەزان لە دینی ئیسلامدا مانگی خێر و بەرەكەتە، بەڵام زۆرجار ژمارەیەك لە فرۆشیار و بازرگان ئەم مانگە بە هەلدەزانن و شمەك و كاڵاكانیان بە نرخیێكی زیاتر دەفرۆشن، ئەگەرچی حكومەتیش ساڵانە بۆ كۆنترۆڵكردنی ئەم دۆخە چەندین لیژنە لە شارەكاندا پێكدەهێنێت بەڵام تائێستا نەتوانراوە بە تەواوەتی كۆنترۆڵ بكرێت.

187 جار خوێندراوەتەوە