رەوەتی حیكمە و حیزبی دەعوە وەڵامی هۆشیار زێباری دەدەنەوە

06:21 - 18/04/2019
عێراق

سەڵاح عەرباوی بۆ زێباری: پێش ئەوەی ببیت بە پارێزەری عەبدولمەهدی نەوتەكە رادەست بكەن
عەلی عەلاق: تۆمەتباركردنیان بە هەوڵدان بۆ دوورخستنەوەی عەبدولمەهدی بێ بنەمایە

 

قسەیەكی هۆشیاری زێباری، ئەندامی مەكتەبی سیاسی پارتی دیموكراتی كوردستان، كاردانەوەی رەوتی حیكمە‌و حیزبی دەعوەی عێراقی بەدوای خۆیدا دەهێنێت. 

دوای ئەوەی هۆشیار زێباری، حیزبی دەعوە‌و رەوتی حیكمەی بە هەوڵدان بۆ شكستپێهێنان‌و دوورخستنەوەی عادل عەبدولمەهدی سەرۆك وەزیرانی عێراق تۆمەتباركرد. لە كاردانەوەی ئەو هەڵوێستەی زێباریدا، سەلاح عەرباوی، بەڕێوەبەری نوسینگەی عەممار حەكیم، سەرۆكی رەوتی حیكمە هێرشی توندی كردە سەر هۆشیار زێباری و  لە تویتێكدا رایگەیاند: بۆ وەزیری لەكارلابراوی پێشوو هۆشیار زێباری، پێش ئەوەی ببیت بە پارێزەری حكومەتی عەبدولمەهدی، رێككەوتنەكەتان لەگەڵیدا جێبەجێ بكەن، بۆ ئەوەی 250 هەزار بەرمیل نەوت بچێتە گەنجینەی دەوڵەتەوە، نەك بۆ گیرفانی حیزبەكان.

هاوكات عەلی عەلاق، سەركردە لە حیزبی دەعوە لە كاردانەوەیدا بەرامبەر بە وتەكانی زێباری رایگەیاند: تۆمەتباركردنیان بە هەوڵدان بۆ دوورخستنەوەی عەبدولمەهدی، بێ ‌بنمایە‌و پشتی بە هیچ بەڵگەیەكی روون‌و ئاشكرا نەبەستووە‌و لە پشت ئەو تۆمەتانەوە ئامانج‌ و مەبەستی سیاسی هەن.

1785 جار خوێندراوەتەوە