هەرێم؛ بەراورد بە ساڵی 2017 كەیسەكانی گەندەڵی لە 2018 زیادیان كردوە

08:31 - 15/04/2019
کوردستان

لە 2018 دا 170 كەیسی گەندەڵی دراونەتە دادگاكانی هەرێم

بەپێی ئامارێكی دەستەی دەستپاكیی هەرێمی كوردستان, لە 2018 دا, 170 كەیسی گەندەڵی دراونەتە دادگاكانی هەرێم, كە لە نێویاندا دوو وەزیر بە گەندەڵی تێوەگلاون.


سەرۆكی دەستەی دەستپاكیی هەرێمیش باس لەوەدەكات, بەراورد بە ساڵی 2017 ، كەیسەكانی گەندەڵی زیادیان كردوە و بەپێویستیشی دەزانێت لە هەرێمی كوردستان، هاوشێوەی بەغدا، دادگایەك تەرخان بكرێت بۆ ئەوەی كەیسەكان بە زوویی یەكلایی بكرێنەوەو گەندەڵكاران سزابدرێن...

 

بەپێی ئامارێكی دەستەی دەستپاكی هەرێمی كوردستان لەسالی 2018ە 170 كەیسی گەندەلی تۆمار كراون  كە 2 وەزیر و سەرۆكی دەستەیەك كەپلەی وەزیرە لەگەل ژمارەیەك بەرپرسی پلە بالای تر لەلایەن دەستەی دەستپاكیەوە دراونەتە دادگا بەهۆی تێوە گلانیان لەگەندەلی .

 

بە پێی ئامارەكانی دەستەی دەستپاكی هەرێمیش  لەسالی 2018ە بەبەهای زیاتر لە 275 ملیار و حەوت سەد و بیست ملیۆن دینار گەندەلی كراوە . سەرۆكی دەستەی دەستپاكیش ئاماژە بەوە دەكات كەیسەكانی گەندەلی لەچاو سالی 2017 زیادیان كردوە.

دەشڵێت: پێویستیان بەدادگای تایبەتمەند هەیە بۆ یەكلاكردنەوەی كەیسەكان.

سەرۆكی لیژنەی دەستپاكی لە پەرلەمانی كوردستان ئاماژە بەوە دەكات پێویستە دەستەی دەستپاكی ناوی هەمو ئەوكەسانەی لەگەندەلی تێوەگلاون بۆ رای گشتی ئاشكرا بكات ., ئەو رێكخراوانەشی كە لەبواری گەندەلی كاردەكەن باس لەوە دەكەن كە تەنیا كەسانی ئاسایی و پلە نزم دراوەنەتە دادگا نەك بەرپرسە بالاكان.

لەكۆی 170 كەیسی گەندەلی كە ئاراستەی دادگاكان كراون 33 كەیسیان یەكلای كراونەتەوە و 117 كەیسیش لەدادگا ماوەتەوە و 20 كەیسەكەی تریش گەرێندراوەتەوە بۆ دەستەی دەستپاكی بۆ ئەوەی وردبینی و بەدواداچوونی زیاتری بۆ بكەن.

269 جار خوێندراوەتەوە