نیوزلەندا؛ ئەنجامدەری هێرشی سەر دوو مزگەوتەكە بەنیازی ئەنجامدانی هێرشی دیكەبووە

08:37 - 16/03/2019
جیهان

نیوزلەندا؛ تاوانبارەكە برایە بەردەم دادگا و دانیشتنی داهاتووی دادگاش رۆژی پێنجی نیسانە 

 سەرۆك وەزیرانی نیوزلەندا دەڵێت: ئەو تاوانبتارەی هێرشی كردە سەر دوو مزگەوتی موسڵمانان و 49 نوێژخوێنی كوشت، ئەگەر دەستگیرنەكرایە، بەنیاز بوە هێرشی دیكە ئەنجام بدات..

جاسیندا ئەردیرن سەرۆك وەزیرانی نیوزلەندا، لە كۆنفرانسێكی رۆژنامەنوسیدا رایگەیاند: لەئۆتۆمبێلەكەی برینتن تارانت، ئەو كەسەی تاوانی هێرشی سەر دوو مزگەوتەكەی ئەنجامدا، دوو چەكی دیكە دۆزراونەتەوە و بەدڵنیاییەوە ویستوێتی هێرشی دیكە بكاتە سەر شوێنی دیكە. 

تۆمەتباری ئەو رووداوە، دەستگیر كراوە و ئەمڕۆ شەممە برایە بەردەم دادگا، دادوەر بەدەستبەسەركراوی لەزینداندا هێشتییەوە تا رۆژی پێنجی نیسان بۆ ئەوەی جارێكی دیكە ببرێتەوە بەردەم دادگا. 

دوێنێ هەینیی برینتن تارانت، گەنجێكی تەمەن 28 ساڵ بەڕەگەز ئوسترالی، هێرشی كردە سەر دوو مزگەوتی موسڵمانان لە نیوزلەندا‌و لەو روداوەدا 49 نوێژخوێن كوژران و 48 كەسیش بریندار بوون. 

هاوكات بە تۆمەتی بەشدارییان لە رووداوەكەدا،  جگە لە برینتن تارانت، سێ پیاو ‌و ژنێكیش دەستگیركراون.

2718 جار خوێندراوەتەوە