هەرێم؛ قەدەغەی ڕاوەماسی لە 14ی ئازار بۆ 14ی حوزەیران بەردەوام دەبێت

08:22 - 14/03/2019
کوردستان

هەرێم؛ وەرزی قەدەغەكردنی راوەماسی دەستیپێكرد
دەربەندیخان؛ هاوڵاتیان ئاگادار دەكرێنەوە لە قەدەغەی ڕاوی ماسی


وەرزی قەدەغەكردنی ڕاوە ماسی لە هەرێم دەستیپێكرد و تا ڕۆژی 14ی حوزەیران بەردەوام دەبێت, پۆلیسی دارستان و ژینگەی پارێزگای سلێمانی-یش، داوا لە هاوڵاتیان و ڕاوچییانی ماسی دەكات كە خۆیان بەدور بگرن لە ڕاوی ماسی، ئەوەش لەپێناو پاراستن و زیادبونی ڕێژەی ئەو سامانە ئاوییە, بەپێچەوانەشەوە هۆشداری دەداتە سەرپێچی كاران.

هاوكات ڕاوچیانی ماسی، لە سنوری دەریاچەی دەربەندیخانیش، پابەندی خۆیان بە بڕیارەكەوە دەردەبڕن و دەشڵێن؛ پێویستە حكومەت ڕێگری لە ڕاوە ماسی نایاسایی بگرێت.

لە دەریاچەی دەربەندیخان، ڕاوچیەكانی ماسی سەرقاڵن بە كۆكردنەوەی كەرەستە و پێداویستیەكانی تایبەت بە ڕاوكردنی ماسی, لە ناوەڕاستی ئەم مانگەوە كەوەرزی گەرادانانی ماسی لە سەرچاوە ئاوییەكانی هەرێم دەستپێدەكات.

هەر بەو هۆیەشەوە، وا بڕیارە لە ڕۆژی 15ی ئەم مانگەوە بۆ ماوەی سێ مانگ، راوكردنی ماسی لە سەرچاوە ئاوییەكان قەدەغە بكرێت.

لە ئێستا بە دواوە, ئەم ڕاوچیانە لە خەمی ئەوەدان, لە ماوەی سێ مانگی قەدەغەكردنی ڕاوی ماسی, بەشێوەی نایاسایی ڕاوی ماسی بكرێت, چونكە بە وتەی ئەوان ڕاوكردنی ماسی لەو سێ مانگەدا, هۆكارێك بوە بۆ كەمبونەوەی سامانی ماسی.

وتەبێژی پۆلیسی دارستان و ژینگەی پارێزگای سلێمانیش رایدەگەیەنێت، لە ماوەی وەرزی قەدەغەكردنی راوی ماسی، بە چەند رێگەیەك هەوڵەكانیان دەخەنە گەڕ، بۆ ئەوەی لە سەرچاوە ئاوییەكانی سنورەكەدا، رێگری لە راوی ماسی بكەن.

ساڵانە لە ڕۆژی 15ی مانگی ئازارەوە,بەهۆی وەرزی گەرادانانی ماسیەوە، بۆ ماوەی نزیكەی سێ مانگ، لە سەرچاوە ئاوییەكانی هەرێمی كوردستان, ڕاوی ماسی بە هەموو شێوازێك قەدەغە دەكرێت، بە وتەی راوچیەكان، ڕاوكردن لە ماوەی ئەو سێ مانگەدا, هۆكارێكی كەمبونەوەی سامانی ماسی بووە.

803 جار خوێندراوەتەوە