به‌ وێنه‌؛ شوێنەوارێكی مێژوویی له‌ هەڵەبجە بەرەو لەناوچوون دەچێت

01:01 - 12/02/2019
هەمەڕەنگ

شارێكی مێژوویی لە روژئاوای پارێزگای هەڵەبجە بەرەو لەناوچوون دەچێت

 

شارەزوور یەكێكە لە ناوچە دێرینەكانی هەرێمی كوردستان كە لە سەردەمانی پێش زایینەوە ژیانی تیادا بووە و مێژوویەكی كۆنی هەیە، بۆیە بوونی ناوچەی شوێنەواریی لە ناوچەكەدا بەرفراوانە و پاشماوەی شوێنەوارە مێژووییەكان لەم ناوچەیەدا بەدی دەكرێت و بوونەتە جێگای سەرنجی تیمەكانی شوێنەوارناسانی لە ناوخۆیی و بیانیی و گەشتیاران. 

 

شوێنەوارێكی پێنج هەزار ساڵی كە بە تەلبەندێكی یەك مەتری دەوردراوە لە لیواری لە ناوچووندایە.

 

گوندی بەكراوا كە بەدووری سێ كیلۆمەتر دەكەوێتە رۆژئاوای پارێزگای هەڵەبجە، شوێنەوارێكی مێژوویی و دڵڕفێن و سەرسەوز لە بناری گردێكی مێژوویی كە بە ناوچەی شوێنەواری دەوردراوە، بەرەو لەناوچوون دەچێت.

پارێزگای هەڵەبجە بێبەش نەبووە لە بوونی شوێنەواری دێرین هەر بۆیە لە ناوچەكەدا لەئێستادا نزیكەی 150 ناوچەی شوێنەواری تۆماركراوە كە گرنگترین و كۆنترینیان شوێنەواری گوندی بەكراوایە كە بەكۆنترین شوێنەواری مێژوویی دەناسرێت لە ناوچەكەدا كە سەردەمەكەی دەگەرێتەوە بۆ پێنج هەزار ساڵ بەر لە ئێستا.

گردی بەكراوا كە پاشماوەی شارێكی كۆنە تا ئێستا نەتواندراوە بەڵگەی پێویست دەست بكەوێت كە ئەو شارە لە ئەسڵدا ناوی چی بووە.

ئەم شوێنەوارە لە ساڵی 2016-2017 بە فەرمی لەلایەن حكوومەتی هەرێمەوە ناسێندراوە و دەست بە لێكوڵینەوە كراوە لە لایەن چەند تیمێكی بیانی بە هاوكاری تیمی شوێنەوارناسانی هەرێمی كوردستان و تواندراوە 600 پارچە شوێنەواری تیادا بدۆزرێتەوە كە پێكهاتبوون لە گۆزە و مۆر و ئامێری ئیشوكاری رۆژانە و هەروەها چەقۆ و سەرەڕمی برۆنزی و جامی برۆنزی و جلوبەرگ و چەندەها كەرەستەی تر.

شێوازی دروستكردنی خانووی ئەم شارە مێژووییە كە لە میانی لیكۆڵینەوەدا بەدیاركەوتوون، شێوە هێلكەییە كە لە بەشی سەرەوەی ئەم خانووانە دەرگای چوونەدەرەوەو ناوەوەی هەبووە.

بەهۆی زۆری بوونی ناوچەی شوێنەواری لە ناوچەكەدا، شارەزوور بە دەشتی وڵاتی زاموا ناسراوە و هەموو ئەم شوێنەوارانە لە لیستی شوێنەواری عێراق و هەرێمی كوردستان تۆمار كراوە.

251 جار خوێندراوەتەوە