سوریا؛ ئاوارەكانی كەمپی عەین عیسا رێگەی چوونە دەرەوەیان پێنادرێت

05:30 - 11/02/2019
عێراق

بەرێوەبەری كەمپی عەین عیسا: دوو مانگە بەشە خۆراك نەدراوە بە ئاوارەكان

 سەرەرای بەردەوامی پرۆسەی ئاوارەبونی دانیشتوانی ناوچەكانی رۆژهەڵاتی سوریا، بەڵام بارودۆخی كەمپەكانی ئاوارەكانی ئەو ولاتە رۆژ لە دوای رۆژبەرەو خراپی دەڕوات. كەمپی عەین عیسا لەباكوری سوریا نمونەی ئەو بارودخە خراپەیەو ماوەی دوومانگە هیچ بڕەخۆراكێك بە سەر دانیشتوانەكەی نەدراوە.

بۆ دانیشتوانی ئەم كەمپە كە دەكەوێتە شارۆچكەی عەین عیسا لە باكوری سوریا،  تەنها جیهێشتنی ماڵ‌و زێدی خۆیان نەبۆتە مایەی نیگەرانی، ئەوان ئێستا روبەروی كێشەیەكی دیكە بونەتەوە ئەویش كەمی خۆراك و پێدوایستیە چونك ماوەی دوو مانگە هیچ بڕە خۆراكێكیان بۆدابین نەكراوە، ئەوەش ناچاری كردون خۆیان خەمی  خۆیان بخۆن.

رێگەپێ نەدانیان بۆ جهێشتنی كەمپەكە كێشەیەكی دیكەیە كە رووبەری دانیشتوانی ئەم كەمپە دەبێـتەوە، بەرپرسانی كەمپەكە بەهۆكاری ئەمنی رێگە بەچونە دەرەوەیان نادەن، تاكو لەلایەن یەكێك لە دانیشتوانی شارۆچكەی عین عیساوە گرەنتی نەكرێن، ئەوەش بەربەستێكی دیكەی بەردەم پەیداكردنی خۆراكە، چونكە بەشێك لە دانیشتوانی كەمپەكە دەیانەوێت كاربكەن و بژێوی ژیانیان دابین بكەن، بەڵام نەناسینی كەسێك لەدانیشتوانی عەین عیسا ئەو چانسەی بۆنەهێشتونەوە.

بەرێوەبەری كەمپەكەش  وێرای پشتراستكردنەوەی قسەی ئاوارە نیشتەجێبوەكانی ئەم كەمپە، هیچ چارەسەرێكی بەپەلەی بۆ ئەو كێشەیە لا نیە جگە لەوەی داوای هاوكاری لەرێكخراوە ناحكومیەكان بكات.

شەڕی داعش لەسوریا لەقۆناغی كۆتاییدایە، بەڵام بەتێروانین لەو دۆخەی عێراقی لەدوای داعش پێداتێپەری، پێناچێـت راستەخۆ دوای كۆتایی هاتنی شەڕی لەناوبردنی ئەو گروپە، ژیانی كەمپنشینی ئەم ئاوارانەش كۆتایی بێت، بەپێچەوانە رەنگە گەرانەوەیان بۆ ژیانی ئاسایی پێش  سەرهەڵدانی جەنگ، ماوەیەكی زۆری پێبچێت.

226 جار خوێندراوەتەوە