چوارقوڕنە؛ سوتاندنی سەگێك كاردانەوەی لێدەكەوێتەوە

03:19 - 10/02/2019
هەمەڕەنگ

سوتاندنی سەگێك لە ناحیەی چوارقوڕنەی سەر بە قەزای رانیە، بە خێرایی كاردانەوەی هاوڵاتییانی هەرێمی، لێدەكەوێتەوە، بەشێك لە بەكارهێنەرانی تۆڕە كۆمەڵایەتییەكان و چالاكانی مەدەنی داوا دەكەن، بكەری ئەو كردەوەیە بدۆزرێتەوە و بدرێت بە دادگا.

لایەنە پەیوەندیدارەكانی سنورەكەش بەدواداچوون دەكەن و لە هەوڵی دەستگیركردنی تاوانبارەكەدان.

بەرەو گۆڕستانی گەورەی چوارقورنە دەچین لە قەزای رانیە ، ئەوە كولانەی ئەو سەگە سوتاوەیە كە ئێوارەی رۆژی هەینی لێرە سوتاندبویان. 

لەم وێنە و ڤیدیۆیانەدا وا دەردەكەوێت كە هاوڕێی سەگە سووتاوەكە، بە چاوی فرمێسكەوە  بەدیاریەوە وەستاوە.

دوای بڵاو بونەوەی ئەم وێنەیە لە تۆڕكۆمەڵایەتەكاندا، چالاكوانێك 600 هەزار دینار دەدات بەهەر كەسێك، ئەو كەسە بدۆزێتەوە كە ئەم سەگەی سووتاندووە تا بیدەن بە دادگا.
 
ئەو چالاكوانە، لەچەند رۆژی داهاتووشدا لەسەر ئەركی خۆی، سەگەكەی تر دەبات بۆ ڕێكخراوێكی ئیتاڵی تا سەرپەرشتی بكەن.

ئەم شایەتحاڵە كە ماڵی نزیك گۆرستانەكەیە دەڵێت، "كارەساتێكی دڵ تەزێن و نامرۆڤانەیە، گۆرستانەكە بوەتە شوێنی حەوانەی بێسەرپەرشتان .

لایەنە پەیوەندیدارەكانی ناوچەكە، بەدواداچوون دەكەن و لە هەوڵی دەستگیركردنی بكەری ئەو تاوانەدان ، هەر لەو دیوی گۆرستانەكەوە، چەندین كەلاكی سەگی تۆپیو دەبیندرێن  كە وەك شایەتحاڵانی ئەو شوێنە باسیان لێوە دەكرد، بە دەرمان ژەهر خوارد كراون 

مامۆستایەكی ئاینی دەڵێت: " لە ئاینی ئیسلامدا بەهیچ شێوەیەك ئازاردان و كوشتنی ئاژەڵان ڕێگە پێدراو نیە‌و نموونە ئەوە دەهێنێتەوە كە چۆن خوای گەورە لەو كەسە  خۆش بوە كە بە پێڵاوەكەی ئاوی داوەتە سەگێكی تینوو.

هەر لە كۆنەوە مرۆڤ سوودی لە سەگ  وەرگرتوە، تا ئێستاش لە بەشێك لە بوارە گرنگەكانی ژیان سوودی لێوەردەگیرێت، هەریەكەمان چەندین چیرۆكی سەرسوڕهێنەرمان لەبارەوە بیستوە كە یەكێك لە سیفەتەكانی ئەوەیە كە ، ئاژەڵێكی  بەوەفایە .

مرۆڤدۆستی و لەبەرامبەریشیدا رەفتاری دڕندانەی مرۆڤەكان، سنوری نیە ، دوای ئەوەی لێرە سەگێك دەسوتێنرێت، كەلاكی سەگە سوتێنراوەكە لە شوێنێكی نادیار ژێرگڵ دەكرێت، دواتر سەگەكەی تر واتە هاوڕێی سەگە سوتێنراوەكە، دەگەڕێتەوە ئێرە و هاوڕێكانی تری لە دەوری كۆبونەتەوە  و دڵنەوایی دەكەن.

2231 جار خوێندراوەتەوە