ژن ‌و مێردێك بوونەتە فریادڕەسی ئاژەڵەكان

08:35 - 07/02/2019
هەمەڕەنگ

ژن و مێردێك ژیانیان بۆ ئاژەڵە بریندار و نەخۆشەكان تەرخانكردووە

خێزانێكی دوو كەسی ماوەی چەند ساڵێكە لە شاری سلێمانی خۆیان تەرخانكردووە بۆ بەهاناوەچونی ئاژەڵی بەرەڵا ‌و نەخۆش و لەماڵەكەی خۆیاندا چارەسەریان دەكەن، سیروان و فریشتەی هاوسەری سەرەڕای حەزی خۆیان بۆ ئەو ئیشە دەیانەوێت خەڵكی دیكەش گرنگی بە ئاژەڵەكان بدات ‌و هەوڵی پاراستنیان بدەن. 

خێزانێكی ئاژەڵ دۆست، بوونەتە فریاد ڕەسی ئاژەڵە بریندارو نەخۆشەكان ‌و لە پەنای ماڵەكەی خۆیانەوە، پەناگەیەكیشیان بۆ ئاژەڵەكان كردوەتەوە.

سیروان عەبدوڵا و فریشتەی هاوسەری، ماوەی 11 ساڵە دوور لە خزم و دۆستانیان، خەریكی تیماركردنی سەگ و پشیلەكانن، خۆشەویستییان بۆ كارەكە، ناچاری كردوون خانووەكەی خۆیان لەناو شاری سلێمانی بفرۆشن و ڕوو بكەنە ئەم دەشتە تا كارە خۆبەخشیەكەیان فراوان بكەن.

ئەوان بۆ ساتێكیش ماڵەكەی خۆیان جێنەهێشتووەو ئاژەڵەكانیان بێناز نەكردووە، ئەو ئاژەڵانەی كە بێڕەحمانە كەوتوونەبەر پەلامارو زەبری كوشندەوە.
دەیانەوێت بە خەڵك بڵێن: ئاژەڵەكانیش مافی ژیانیان هەیەو بەشێكن لە سروشت.

فریشتە مامۆستای ئامادەییەو ڕۆژانە كە لەقوتابخانە دەگەڕێتەوە، جلێكی تایبەت لەبەردەكات و بە بەردەوامی خزمەتی سەگ و پشیلەكان دەكات.

ئەم ئاژەڵانە پێویستیان بە خۆراك و چارەسەری پزیشكی هەیە، دەبێ سیروان ڕۆژانە بچێتە دەرەوە‌و خواردن و دەرمان بهێنێتەوە، چەند پزیشكێكی قێتێرنەریش خۆبەخشانە چارەسەری تەندروستی بۆ ئاژەڵەكان دەكات.

ئێستا لەهەرێمی كوردستان چەند ڕێكخراوێك بۆ پاراستنی مافی ئاژەڵ بونیان هەیە، بەڵام تائێستا هیچ یاسایەك نییە لەچوارچێوەی ماف و بەپرسیارێتی گشتیدا بیانپارێزێت. لەزۆربەی شەقام و كۆڵانەكانی كەنار شاریش، بە سەدان سەگ و پشیلەی بەرەڵا هەیەو زۆرجاریش دەبنە مەترسی لە بڵاوبونەوەی نەخۆشی و بێزاركردنی خەڵك.

569 جار خوێندراوەتەوە