4ی شوبات رۆژی جیهانیی نەخۆشیی شێرپەنجەیە

08:40 - 04/02/2019
تەندروستی

هەرێم؛ لە ساڵی رابردوودا پێنج هەزار و 658 كەس تووشی شێرپەنجە بوون 

 

رۆژی 4 ی شوبات بە رۆژی جیهانیی نەخۆشی شێرپەنجە دانراوە، لە ماوەی ساڵێكدا زیاتر لە پێنج هەزار كەس لە هەرێم، توشی نەخۆشیەكە بون و بەراورد بە ساڵی 2017 رێژەكە زیادی كردوە.

 

پزیشكێكی نەشتەرگەرییش ئامۆژگاری دەكات بۆ ئەوەی لە توشبون بە نەخۆشیەكە دور بین، دەبێت لە  جگەرە كێشان و زیادبونی كێش و خواردنی مادە حكولیەكان و وەرزش نەكردن دور بكەوینەوە..'

 

رۆژی 4 ی شوبات بە رۆژی جیهانیی نەخۆشی شێرپەنجە دانراوە, وەزارەتی تەندروستیی حكومەتی هەرێمی كوردستانیش، بەم بۆنەیەوە ئاماری توشبوانی نەخۆشیەكەی بۆ ساڵی 2018ی بڵاوكردەوە، كە لە ساڵی رابردودا، پێنج هەزار و 658 حاڵەتی نەخۆشیەكە لە هەرێم تۆمار كراون ‌و  بە بەراورد بە ساڵی 2017 , 667 حاڵەتی نەخۆشیەكە زیادی كردوە.

 

بەپێی ئامارەكەی تەندوستی هەرێم، رێژەی توشبوان بە نەخۆشی شێرپەنجە لە هەرێم لە ژناندا، زیاترە وەك لە پیاوان، شێرپەنجەی مەمك و سییەكان لە پێشەوەی هەموو جۆرەكانی شێرپەنجەوە دێن.

 

شێرپەنجە نەخۆشییەكی درێژخایەنە و زیاتر لە 100 جۆری هەن كە زۆربەیان كوشندەن, خانە شێرپەنجەییەكان بەوە ناسراون بەبێ كۆنتڕۆڵ، دابەش دەبن و زۆر دەبن, خانەكانی نزیكی خۆیان داگیر دەكەن و بڵاودەبنەوە..

 

رێكەوت حەمە رەشید وەزیری تەندورستی حكومەتی هەرێم ئاماژە بەوەدەكات: ئاماری توشبوان لە هەرێم لە ژێر ستانداردە جیهانیەكاندایە بەو پێیەی لە 100 هەزار كەس 105 كەس توشی نەخۆشیەكە بون.

 

د. دەوەن حەوێزی، پزیشكی نەشتەرگەریی گشتی و مامۆستای سكوڵی پزیشكی زانكۆی كۆیە، باس لەوەدەكات, جگەرە كێشان لە هۆكارە سەرەكییەكانی توشبونە بە شێرپەنجە، و دواتریش زیادبونی كێش و خواردنی مادە حكولیەكان و وەرزش نەكردن و پیسبونی ژینگە و چەند هۆكارێكی تر دێن.

 

بەپێی ئامارەكانی رێكخراوی تەندروستیی جیهانی، لە ساڵی 2018دا زیاتر لە 18 ملیۆن و 100 هەزار كەس توشی نەخۆشی شێرپەنجە بوون و زیاتر لە نۆ ملیۆن كەسیش بەهۆكاری ئەو نەخۆشیە گیانیان لەدەستداوە.

556 جار خوێندراوەتەوە