دوو کتێبی دیکەی نەوشیروان مستەفا چاپ دەکرێن

09:14 - 03/02/2019
کوردستان

دوو کتێبی دیکەی نەوشیروان مستەفا ئەمین لە بواری ئەدەبدا چاپ دەکرێن، کە پێش کۆچی دوایی نوسیویەتی و بڕیارە لە دووەم ساڵیادی کۆچی دواییدا بڵاو بکرێتەوە.

مەجید ساڵح، سەرپەرشتیاری لە چاپدانی کتێبەکانی نەوشیروان مستەفا ئەمین به‌ KNNی راگه‌یاند: "لە ئەرشیفی کاک نەوشیروان مستەفا کتێبێکی نوێ دۆزراوەتەوە بە ناوی "گه‌شتێ له‌گه‌ڵ سالم" کە قەبارەکەی 250 لاپەڕەیە، بەشەکانی کتێبەکە پێکهاتوون لە:
1. قاڵبه‌ شیعریه‌کانی مه‌دره‌سه‌ی بابان
(سالم وه‌ک نمونه)
2. بابه‌ته‌کانی شیعری سالم
هه‌ندێ لایه‌نی ژیانی کۆمه‌ڵایه‌تی


مەجید ساڵح، سەرپەرشتیاری لە چاپدانی کتێبەکانی نەوشیروان مستەفا ئەمین وتیشی، "کتێبێکی دیکەی بەناوی (نەوەی دووەمی قوتابخانەی بابان)، کە تایبەتە بە شاعیران (حاجی قادر کۆیی، وەفایی، حەریق، شێخ رەزای تاڵەبانی) لە ئەرشیفی تایبەتی کاک نەوشیروان و دوای کۆچی دوایی لەناو کۆمپیوتەرەکەیدا دۆزراوەتەوە.

ئاماژه‌ی به‌وه‌شكرد، "بڕیارە لە دووەم ساڵڕۆژی کۆچی دواییدا، لە درێژەی زنجیرەی کتێبی بەدەم رێگاوە گوڵچنین هەندێک لە کتێبە چاپ نەکراوەکانی لە چاپ بدرێت".

بە وتەی مەجید ساڵح، ئەو کتێبانە تایبەتن بە بواری ئەدەب و لە چوارچێوەی بەرگی سێیەم و چوارەمی کتێبی یەکەمی "بەدەم رێگاوە گۆڵچنین" چاپ دەکرێت.

ساڵی رابردوو لە یەکەم ساڵیادی کۆچیی دواییدا، کتێبێکی دیکەی رەوانشاد نەوشیروان مستەفا بڵاوکرایەوە بەناونیشانی (کورد و کوردستان لە رۆژنامەی تێگەیشتنی راستی و گۆڤاری لغة العرب دا).

1316 جار خوێندراوەتەوە